Երեւանում այսօր՝ մայիսի 13-ին, գիշերը «Բրավո» տաքսի ծառայության տնօրեն Լեւոն Ավետիսյանի տան անդամներն ավազակային հարձակում գործած անձանցից պաշտպանվել են ձեռքի տակ ընկած պարագաներով, այդ թվում թավայով եւ կաթսայով: Այս մասին NEWS.am-ի թղթակցին ասաց Լեւոն Ավետիսյանի դուստրը՝ Անահիտ Ավետիսյանը:
«Ժամը չորսի սահմաններում քնած էինք, ձայներ ենք լսել հորս ու մորս ննջասենյակից: Ես ու ամուսինս գնացինք այնտեղ, տեսանք, որ երկու դիմակավոր անձինք ծեծի են ենթարկում ծնողներիս: Հարձակվեցինք նրանց վրա, ինչով կարողացել, խփել ենք»,- պատմեց Անահիտը:
Աղջկա խոսքով՝ հարձակվողներից մեկը դանակով է հարվածներ հասցրել, մյուսը՝ ատրճանակով, այդ պահին օգնության է հասել եղբայրը, որը դպրոցական է. «Ես անգամ չեմ հասկացել, թե ինչով են վիրավորել հորս՝ զենքով, թե դանակով: Իսկ ամուսնուս ու եղբորս դանակահարել են: Ես արագ հեռախոսս վերցրել եմ եւ զանգել ոստիկանություն ու «Շտապօգնություն»: Մինչեւ եկել են, նրանք արնաքամ էին եղել»:
Ըստ ոստիկանության տարածած հաղորդագրության՝ մայիսի 13-ին ժամը 04:25-ին հաղորդում է ստացվել, որ Դոդոխյան փողոցի 24 տնից վիճաբանության ձայներ են լսվում:
Շտապ մեկնած օպերատիվ խումբը հիշյալ հասցեում հայտնաբերել է բնակարանատերեր Լեւոն Ա.-ին, Դավիթ Ա.-ին, Սամվել Հ.-ին, ինչպես եւ երկու անձանց՝ մարմնական վնասվածքներով:
Ձեռնարկված միջոցառումներով պարզվել է, որ վերջիններս Երեւանի Պոպովի փողոցի բնակիչներ, 25-ամյա Էդգար Մանուկյանն ու 29-ամյա Հրաչյա Ֆալանջյանն են:
Ճշտվել է, որ նրանք նույն օրը, ժամը 4:00-ին, ավազակային հարձակման նպատակով լոգարանի պատուհանից մտել են Դոդոխյան 24 տուն, որտեղ հանդիպելով բնակարանատերերի դիմադրությանը՝ ատրճանակի ու դանակի գործադրմամբ հրազենային ու ծակած-կտրած վնասվածքներ են պատճառել նրանց:
Ավազակային հարձակում գործածները նույնպես վնասվածքներ են ստացել, ինչի հետեւանքով Հրաչյա Ֆալանջյանը մահացել է, իսկ Էդգար Մանուկյանը տեղափոխվել է հիվանդանոց:
Նշենք, որ Հրաչյա Ֆալանջյանը ոստիկան է եղել. նրա նկատմամբ մայիսի 1-ին, կարգապահական կոպիտ խախտման համար, նշանակվել էր ծառայողական քննություն, որի արդյունքներով նա ազատվել էր աշխատանքից:
Կատարվում է նախաքննություն:
