Երեւանում այսօր գիշերը «Բրավո» տաքսի ծառայության ընկերության տնօրենի տան վրա ավազակային հարձակում կատարելու մեջ կասկածվող 29-ամյա Հրաչյա Ֆալանջյանի հարազատները պնդում են, որ նա ոստիկանության աշխատակից է, աշխատանքից հեռացված չի եղել, իսկ դեպքի օրն էլ հերթապահության է եղել: Ավազակային հարձակման ժամանակ ստացված վնասվածքներից մահացած Հրաչյայի հարազատների խոսքով, այդ օրը երեկոյան նա իր մորն ասել է, որ աշխատանքի է գնում՝ հերթապահության է եւ գիշերը տուն չի գալու:
«Հրաչյան աշխատանքի է եղել, ոնց կարար աշխատանքից հեռացված լինել: Մորն ասել է, որ հերթապահության է եւ գնացել է»,-NEWS.am-ի հետ զրույցում պատմեցին Հրաչյայի հարազատները:
Նրանց խոսքով, Հրաչյան խելոք, աշխատասեր տղա էր եւ ընդունակ չէր նման արարքի, հարազատների համար այս պատմության մեջ շատ բան անհասկանալի եւ մութ է մնում. «Ինքը շատ լավ, խելոք տղա էր, նման քայլի ընդունակ չէր: Բացի այդ ասում են՝ պատուհանից է մտել, ոնց կարող էր պատուհանից մտնել էդ մարդկանց տուն՝ մոտ 110 կիլոգրամ էր, անգամ մի քանի մետր քայլում՝ վատանում էր, շնչահեղձ էր լինում, ուր մնաց պատուհանից տուն մտներ: Նա էն մարդը չէր, որ ավազակային հարձակում իրականացներ ինչ-որ մեկի վրա, նա ոչ մի բանի կարիք չի ունեցել, որ հանուն փողի նման քայլի գնար»:
Նշենք, որ Հրաչյայի հայրը մահացած է, նա ապրում էր մոր եւ փոքր քրոջ հետ:
Ավելի վաղ տեղեկացրել էինք, որ Երեւանում մայիսի 13-ի գիշերը «Բրավո» տաքսի ծառայության ընկերության տնօրենի տան վրա ավազակային հարձակում է տեղի ունեցել: Ավազակային հարձակման մեջ կասկածվում են Հրաչյան ու Էդգարը: Հրաչյա Ֆալանջյանը ավազակային հարձակման ընթացքում տեղի ունեցած ծեծկռտուքի հետեւանքով մահացել է, Էդգարը՝ տարբեր վնասվածքներով տեղափոխվել հիվանդանոց:
Ըստ ոստիկանության տարածած հաղորդագրության՝ Հրաչյա Ֆալանջյանը նախկին ոստիկան է եղել. նրա նկատմամբ մայիսի 1-ին, կարգապահական կոպիտ խախտման համար նշանակվել էր ծառայողական քննություն, որի արդյունքներով նա ազատվել էր աշխատանքից: Ըստ ոստիկանության՝ ավազակային հարձակման նպատակով Հրաչյան ու Էդգարը լոգարանի պատուհանից մտել են Դոդոխյան 24 տուն, որտեղ հանդիպելով բնակարանատերերի դիմադրությանը՝ ատրճանակի ու դանակի գործադրմամբ հրազենային ու ծակած-կտրած վնասվածքներ են պատճառել նրանց: Ավազակային հարձակում գործածները նույնպես վնասվածքներ են ստացել, ինչի հետեւանքով Հրաչյա Ֆալանջյանը մահացել է, իսկ Էդգար Մանուկյանը տեղափոխվել է հիվանդանոց: Տանտերերը դիմադրություն են ցույց տվել ու կարողացել են վնասազերծել նրանց, 57-ամյա Լևոն Ավետիսանը, նրա տղան՝ 17-ամյա Դավիթ Ավետիսյանը և նրանց փեսան՝ 32-ամյա Սամվել Հարությունյանը տեղափոխվել են հիվանդանոց: Հիվանդանոց է տեղափոխվել նաեւ ավազակային հարձակման մեջ կասկածվող 25-ամյա Էդգար Մկրտչյանը: