Եթե մենք ունենայինք համապատասխան զենքերը, Ադրբեջանն ագրեսիայի դիմելու համարձակություն չէր ունենա: Եթե մենք ունենայինք դիվանագիտություն եւ ազգային շահերից բխող հստակ պետական քաղաքականություն, մենք չէինք անդամակցի ՀԱՊԿ-ին: Այս մասին, այսօր՝ մայիսի 16-ին, ԱԺ արտաքին հարաբերությունների հանձնաժողովում ԼՂՀ ճանաչման վերաբերյալ օրինագծի քննարկման ժամանակ նշել է «Ժառանգություն» խմբակցության պատգամավոր, նախագծի համահեղինակ Զարուհի Փոստանջյանը:
«Մենք այս պահին ունենք հողեր, որոնք չենք կարողացել պաշտպանել: Մեր 20-ամյա զինվորները կանխել են աղետը 80-ական զենքերով: Սա մեր անլրջության հետեւանքն է, որ չունենք ժամանակակից զենք, որով պաշտպանվենք: Այդ անլրջությունն է բերել ագրեսիայի Ադրբեջանի կողմից»,-ասաց նա ու հավելեց. «Մենք ասում ենք, որ պետք է փոխել իրավիճակը՝ ճանաչելով ԼՂՀ անկախությունը՝ թույլ տալով, որ Արցախի իշխանությունները կարողանան բանակցել, ոչ թե Մոսկվայից հրավիրեն մի պաշտոնյայի եւ այդ պաշտոնյան ՀՀ-ից գնա Մոսկվա, ու հետո ասեն, թե իրեն են կանչել, ինքն է գնացել: Այդպես չի կարող լինել: Սա անլրջության, ինքնիշխանության բացակայության մասին է խոսում: Եթե պետք էր ինչ-որ տեղ մեկնել, որոշումը պետք է կայացվեր Երեւանում եւ Ստեփանակերտում՝ բարձրագույն մարմնի կողմից: Ոչ թե կանչեն գենշտաբի ինչ-որ ղեկավարի եւ ասեն՝ դե իրեն են կանչել, ինքն էլ մեկնեց: Ու հետո մեր անունից կասեցնեին մեր հայրենիքի ազատագրումը»:
Փոստանջյանի խոսքով, Ադրբեջանը ունենալով Թուրքիայի եւ Ռուսաստանի հովանավորությունը, երբեք չի ճանաչելու ԼՂՀ անկախությունը:
«Բոլոր հիմնավորումները, որ ԼՂՀ ճանաչման դեպքում լայնածավալ ռազմական գործողություններտեղի կունենա, հիմա էլ են տեղի ունենում: Մենք հիմա էլ պատերազմի մեջ ենք ու եթե ուզում ենք կանխել պատերազմը, լինենք գործոն, պետք է ճանաչենք Արցախը»,-ընդգծեց նա:
Նշենք, որ ԱԺ արտաքին հարաբերությունների հանձնաժողովը մերժել է այդ օրինագիծը դրական եզրակացությամբ ընդգրկել ԱԺ մեծ օրակարգում: