Ղարաբաղյան հակամարտության գոտում բռնության աճը հենց ապրիլի սկզբին տեղի ունեցավ, որպեսզի հասարակություններին նախապատրաստեն խաղաղության համաձայնագրին։ Այս մասին մայիսի 17-ին՝ «Վիեննայում նախագահների մակարդակով հանդիպումը. կլինի՞ արդյոք առաջընթաց բանակցային գործընթացում» թեմայով Երեւան-Բաքու հեռուստակամուրջի ժամանակ, ասել է Պատերազմի եւ խաղաղության լուսաբանման ինստիտուտի (IWPR) փորձագետ Շահին Ռզաեւը։
Նրա խոսքով՝ առաջինը, ինչ արձանագրվեց Հայաստանի եւ Ադրբեջանի նախագահների հանդիպման ժամանակ, այն է, որ պատերազմը հակամարտության լուծում չէ։ «Շատ առաջարկներ են արվել դիպուկահարների դուրսբերման մասին։ Հուսամ, դիպուկահարներն այլեւս չեն կրակի»,- նշել է Ռզաեւը եւ հավելել, որ ՌԴ արտգործնախարար Սերգեյ Լավրովը նշել է, որ մինչեւ հունիսի վերջ Ալիեւն ու Սարգսյանը կձեռնարկեն հակամարտության վերջնական կարգավորման գործընթացը։ «Լավրովը սեղանին իր հեղինակությունն է դրել։ Ինչու՞ Ղարաբաղյան հակամարտության գոտում բռնության աճը հենց ապրիլի սկզբին տեղի ունեցավ։ Որպեսզի հասարակություններին նախապատրաստեն խաղաղության համաձայնագրին»,- կարծիք է հայտնել Ռզաեւը։
