Նրանք, ովքեր փորձում են կեղտ լցնել պատգամավոր, գեներալ Մանվել Գրիգորյանի վրա, ջուր են լցնում Բաքվի ջրաղացին: Այս մասին մայիսի 18-ին լրագրողներին ասել է ԱԺ փոխխոսնակ Էդուարդ Շարմազանովը:
«Ցանկացած ապատեղեկատվություն Ադրբեջանի շահերից է բխում, իսկ մենք չպետք է անենք բաներ, որոնք ուրախացնում են Ադրբեջանին: 92 կամ 93 թվականներին եղածը հիշելով մենք ոչ մի տեղ չենք հասնի: Եթե այդպես է՝ ուրեմն ստիպված կլինենք խոսել նաեւ Գարեգին Նժդեհի, Անդրանիկի, Դրոյի հարաբերությունների մասին: Այսպես մենք ո՞ւր կհասնենք: Մենք պետք է դասեր քաղենք Առաջին հանրապետության փորձից: Հանգիստ թողեք Մանվել Գրիգորյանին: Նա Արցախի հերոս է»,- ասել է փոխխոսնակը:
Նշենք, որ Մանվել Գրիգորյանի կերպարը հայկական հասարակությունում ծայրաստիճան հակասական է ընկալվում: Հասարակության զգալի մասը ոչ միայն կասկածի տակ է դնում նրա անձնական ավանդը ղարաբաղյան պատերազմում, այլեւ նշում է, որ Գրիգորյանների ընտանիքը փաստացի սեփականաշնորհել է Էջմիածին քաղաքի ու շրջակա գյուղերի ամբողջ տնտեսությունը: