ԱԺ-ում այսօր քննարկել են Վերահսկիչ պալատի 2105 թվականի հաշվետվությունը: ՀԱԿ պատգամավոր Լեւոն Զուրաբյանը հայտարարել է, որ Վերահսկիչ պալատի զեկույցներն այլեւս արժեք չունեն, քանի իշխանությունը այս տարիներին ամեն ինչ արել է՝ այդ կառույցի լիազորությունները նվազեցնելու համար: Ըստ պատգամավորի՝ դրա պատճառն այն է, որ տարբեր ոլորտներում չարաշահումների վերաբերյալ վերահսկիչի բացահայտումները քննարկումների եւ սուր քննադատությունների ալիք էին բարձրացնում:
Ընդդիմությունը եւ նալին է խփում, եւ մեխին՝ դժգոհել է ՀՀԿ խմբակցության ղեկավար Վահրամ Բաղդասարյանը: Մի քանի տարի առաջ բողոքում էին, որ Վերահսկիչը գերլիազորություններով է օժտված , հիմա էլ՝ լիազորությունները նվազեցրել եք:
Հանրապետականը լծվել է Մանվել Գրիգորյանի պաշտպանության գործին: Այսօր հերթը Շարմազանովինն էր: Նա ապատեղեկատվություն է համարել լուրերը, որ գեներալը հայհոյել ու սպառնացել է զինծառայողներին: Շարմազանովի կարծիքով՝ նման լուրերը Ադրբեջանին են ուրախացնում:
Ապրիլյան պատերազմում ողնաշարային ծանր վիրավորում ստացած 19-ամյա Արման Լազգիյանի վիճակը անսպասելիորեն վատացել է, երեկ նրան վիրահատել են: Ուշ երեկոյան Արմանի մոտ ստամոքսաղիքային սուր արյունահոսություն է սկսվել: 12-մատնյա աղիքում սթրեսային խոց է հայտնաբերվել: Տղային վիրահատել են, խոցը կարել: Արմանի վիճակը հիմա կայուն ծանր է, բժիշկները նպատակահարմար են համարում որոշ ժամանակով հետաձգել Արմանին Գերմանիա տեղափոխելը, որը նախատեսվում էր մինչև այս շաբաթվա վերջ:
Ծանր է նաեւ մայիսի 13-ին Արցախում վիրավորված եւ Երեւան տեղափոխված զինծառայող 21-ամյա Հովհաննես Պողոսյանի վիճակը: Նրան նույնպես այսօր կրկին վիրահատել են: Հովհաննեսը հրազենային միջանցիկ գանգուղեղային ծանր վիրավորում էր ստացել, գտնվում է կոմայի մեջ: Նրան անմիջապես վիրահատել էին Մարտակերտում, հետո Երեւան տեղափոխել: Այսօր բժիշկները նրան երկրորդ անգամ են վիրահատել՝ կոկորդից խողովակ են անցկացրել ՝ թոքերի ու սրտի աշխատանքը նորմալացնելու համար: Հովհաննեսը վերջին մեկ ամսում երկրորդ անգամ էր վիրավորվել:
Մեկ օրում երկու ողբերգական վթար Լոռիում: Գիշերը մեքենան ձորն է գլորվել, ինչի հետևանքով մահացել է մեքենայի ուղևորներից մեկը՝ Գյումրիի բնակիչ 27-ամյա Արշալույս Թանգամյանը: Վարորդն ու մյուս երկու ուղևորները հիվանդանոցում են: Նրանցից մեկի վիճակը ծայրահեղ ծանր է: Նույն օրը՝ ավելի կեսօրից հետո երկրորդ ողբերգական վթարն է տեղի ունեցել Լոռիում՝ Տաշիր- Մեծավան ճանապարհին: Վթարի հետեւանքով մահացել է վանաձորցի երկու երիտասարդ, մեկն էլ տարբեր վնասվածքներով տեղափոխվել է հիվանդանոց: Նրա վիճակը բավարար են գնահատում:
Այսօր բոլոր հիմնական արտարժույթները էժանացել են: Դոլարի փոխարժեքը եղել է 478, եվրոյինը՝ 538, ֆունտինը՝ 689, իսկ ռուբլունը՝ 7.33 դրամ:
Մայիսի 19-ին Երևանում սպասվում է անձրևոտ եղանակ: Բայց օդի ջերմաստիճանը բարձր կլինի՝ գիշերը +12+14, իսկ վաղը ցերեկը՝ +25+27 աստիճան։