էրեբունի բժշկական կենտրոնի վերակենդանացման բաժանմունքում, այսօր՝ մայիսի 21-ին, մահացել է Լոռու մարզի Ալավերդի քաղաքում մայիսի 18-ի լույս 19-ի գիշերը կրակոցներից հրազենային վնասվածք ստացած 34-ամյա Էդվարդ Պողոսյանը: Այս ամսին NEWS.am-ին ասաց Երեւանի «Էրեբունի» հիվանդանոցից:

Նշենք, որ նա Երեւան էր տեղափոխվել Ալավերդու բժշկական կենտրոնից: Այդ դեպքի հետեւանքով, տեղում մահացել էր եւս մեկ անձ՝ Ալավերդի քաղաքի բնակիչ Վարդան Ավագյանը:

Ավելի վաղ NEWS.am-ը հայտնել էր, որ մայիսի 19-ին ժամը 04.30-ին Ալավերդի քաղաքի Զ. Անդրանիկ փողոցի 22-րդ շենքի բակում անհայտ անձը սպանելու դիտավորությամբ, հրազենից կրակոցներ է արձակել Էդուարդ Պողոսյանի և Վարդան Ավագյանի ուղղությամբ։  Ստացած հրազենային մարմնական վնասվածքներից Վ.Ավագյանը տեղում մահացել է, իսկ Էդուարդ Պողոսյանը՝ ձախ բազկի վերին հատվածի հրազենային արյունահոսող վնասվածքով տեղափոխվել բժշկական կենտրոն:

Ավելի ուշ պարզվել էր, որ հրազենային վնասվածքից մահացած 41-ամյա Վարդան Ավագյանը 2007 թ. մարտի 18-ից ՌԴ Կրասնոդարի ՆԳԳՎ կողմից հետախուզման մեջ է եղել՝  ՌԴ քրեական օրենսգրքի 159 հոդվածի 3-րդ մասի /խարդախություն/ մեղադրանքով:

Դեպքի առթիվ հարուցվել է քրեական գործ Քրեական օրենսգրքի 34-104-րդ հոդվածի 2-րդ մասի 1-ին կետով և 235-րդ հոդվածի 1-ին մասով։

Լոռու մարզային քննչական վարչության պետի կողմից որոշում է կայացվել՝ քննչական խումբ կազմելու մասին, մշակվել են աշխատանքային վարկածներ, որոնք ստուգելու ուղղությամբ ձեռնարկվում են անհետաձգելի քննչական գործողություններ։

Նշանակվել են դատաբժշկական, համալիր դատաձգաբանական, դատահետքաբանական, դատակենսաբանական, դատաքիմիական և միկրոմասնիկների փորձաքննություններ, որոշումներ են կայացվել՝ Վարդան Ավագյանին ու Էդուարդ Պողոսյանին տուժող ճանաչելու մասին: Հանցանք կատարած անձին, ինչպես նաև գործի համար նշանակություն ունեցող մի շարք հանգամանքներ պարզաբանելու նպատակով հանձնարարություններ են տրվել հետաքննության մարմնին: