Այսօր` հոկտեմբերի 1-ին, լրագրողների խումբը Մասիսի «Բերրիություն» ՍՊԸ-ի բազայում առիթ ունեցավ անձամբ տեսնելու, թե ինչպես է բեռնաթափվում Հայաստան մուտք գործած էլիտար սերմացուն։ Միջոցառմանը ներկա եղան նաեւ Հայաստանի վարչապետ Տիգրան Սարգսյանն ու գյուղատնտեսության նախարար Գերասիմ Ալավերդյանը։
Բազայի տարածքում ցորենով բեռնված 6 վագոն կար, մեզ տեղեկացրին, որ մյուս 10 վագոնները գտնվում են կայարանում։ Ցորենի վագոններին կցված էին 8 այլ վագոններ, որոնցից 6-ը հաստատապես կոնյակի սպիրտ էին պարունակում։ Վարչապետի զարմացական հարցին, թե այսքան կոնյակի սպիրտն ո՞ւմ է պետք, գյուղատնտեսության փոխնախարար Սամվել Գալստյանը ուսերը թոթվեց։ Կոնյակի սպիրտ պարունակող վագոնների վրա առկա էր Concisa անվանումը, որը, որքանով մեզ հաջողվեց ճշտել, պորտուգալական ընկերության անուն է։
Փաստորեն՝ Հայաստանի կոնյակ արտադրող որոշ գործարաններ խաղող մթերելու փոխարեն, արտասահմանից ներմուծում են կոնյակի սպիրտ, այն էլ՝ մեծ քանակությամբ։ Հիշեցնենք, որ հայկական օրենսդրության համաձայն՝ ներկրված սպիրտով արտադրված կոնյակը չպետք է կոչվի «հայկական կոնյակ», այն ունենալու է «բրենդի» անունը։ Սակայն շուկայում մինչ այսօր հայկական բրենդի չի հայտնվել, իսկ սպառողը գործնականում չի կարող պարզել, թե որ կոնյակն է արտադրվում տեղական հումքով, որը՝ ներկրված սպիրտով։