Հաշվի առնելով Երեւանի հետ առանձնահատուկ սերտ հարաբերությունները՝ Ռուսաստանը Հայաստանում պետք է բացի երկրորդ ռազմակայանը։ «Հայ-ռուսական հարաբերություններ» հեռուստակամուրջի ժամանակ նման տեսակետ հայտնեց Ռուսաստանի Պետդումայի միջազգային հարցերով կոմիտեի անդամ Սեմյոն Բաղդասարովը։
Նրա խոսքով, Հայաստանում մեկ ռուսական ռազմակայանն անկարող է ապահովել երկու երկրների իրական պահանջներն ու նպատակները։ Պատգամավորի կարծիքով, Ռուսաստանի երկրորդ ռազմակայանը կարող է զսպող գործոն դառնալ Թուրքիայի եւ ԱՄՆ-ի համար։ Նա նաեւ նկատեց, որ հետխորհրդային շրջանում Հայաստանը միակ երկիրն է, որտեղ բացի ռուսական ռազմակայանից տեղակայված չէ մեկ ուրիշինը։
«Հայաստանը Ռուսաստանի համար շատ կարեւոր երկիր է, թեկուզ այն առումով, որ հարեւան Վրաստանում բացվում է ՆԱՏՕ-ի գրասենյակը, իսկ հատուկ այդ նպատակով Թբիլիսի է ժամանել Դաշինքի գլխավոր քարտուղար Անդերս Ֆոգ Ռասմուսենը»,- հստակեցրեց Բաղդասարովը։
Սեմյոն Բաղդասարովը փաստացիորեն խոստովանեց, որ Ռուսաստանը շահագրգռված չէ հայ-թուրքական հարաբերությունների կարգավորմամբ։ «Անգամ շատ լավ է, որ հայ-թուրքական արձանագրությունները ձախողվեցին, որովհետեւ դրանք հակասում էին ինչպես Հայաստանի, այնպես էլ Ռուսաստանի շահերին»,- հայտարարեց պատգամավորը: