Volkswagen ընկերությունը Gett տաքսի ծառայությունում (նախկինում՝ GetTaxi) 300 մլն դոլարի ներդրում կկատարի: Գործարքը գերմանական ընկերության զարգացման նոր ռազմավարության առաջին քայլերից է, որն իրականացվելու է մինչեւ 2025 թվականը եւ ուղղված է նոր բիզնես-մոդելների հաշվին վաճառքի ծավալների ավելացմանը:
Ըստ Motor-ի, գործարքի մանրամասները հայտնի կդառնան հաջորդ շաբաթ: Բացի այդ, հունիսին VW-ի աշխատանքային խումբն ընկերության զարգացման մանրամասն ծրագիր կներկայացնի, որի կետերից մեկն էլ Gett-ի հետ համագործակցությունն է:
Իսկ Toyota-ն մայիսի 25-ին հաղորդել էր Uber-ի հետ համագործակցության մասին: Ճապոնական ընկերությունը ներդրում է կատարում տաքսի ծառայությունում եւ դրա վարորդների համար լիզինգի հատուկ պայմաններ նախապատրաստում: Գործարքի արժեքը չի հրապարակվում:
2016 թվականի առաջին եռամսյակում Volkswagen-ը գլխավորել էր նոր մեքենաների համաշխարհային վաճառքի վարկանիշը՝ առաջ անցնելով Toyota-ից: Հունվար-մարտին VW-ն 2.50 մլն ավտոմեքենա է վաճառել, նախորդ տարվա համեմատ՝ 0.8%-ով ավելի: Իսկ Toyota-ի իրացման ծավալները, հակառակը, 2.3%-ով կրճատվել են՝ հասնելով 2.46 մլն-ի:
