Լեռնային Ղարաբաղում ադրբեջանական ագրեսիայի ժամանակ վիրավորման արդյունքում պայմանագրային զինծառայող Էրիկ Մաթեւոսյանը նոր ընկեր է ձեռք բերել:
Մարտական գործողությունների ընթացքում Էրիկը երկու ոտքից հրազենային վիրավորում է ստանում: Ձախ ոտքի վիրավորումը թեթեւ էր, իսկ ահա աջ ոտքի վնասվածքը՝ լուրջ. փամփուշտը ծնկից ներքեւ կոտրել էր ոսկորը, նյարդեր եւ անոթ վնասել: Ուժեղ արյունահոսությամբ Էրիկին վտանգավոր գոտուց դուրս է բերում ընկերներից մեկը, բայց չի կարողանում երկար տանել եւ թողնում է համեմատաբար անվտանգ վայրում: Հենց այստեղ էլ օգնության է հասնում անծանոթ երիտասարդը, վիրակապում ձախ ոտքը, կանգնեցնում արյունահոսությունը, ցավազրկող ներարկում եւ հասցնում Մարտակերտի մոտակա հոսպիտալ:
NEWS.am-ի թղթակցի հետ զրույցում Էրիկը պատմեց, որ աղոտ է հիշում այդ օրն ու ճանապարհը: Նա չէր տեսնում նաեւ իր փրկչի դեմքը եւ չէր պատկերացնում, թե ուր է իրեն տանում. շատ արյուն էր կորցրել ու թուլացել:
«Երբ արդեն հոսպիտալում պառկած էի վիրահատական սեղանին, առաջին անգամ կարողացա տեսնել նրա դեմքը: Անծանոթ էր. նախկինում երբեք չէի տեսել նրան: Այդ ժամանակ հարցրեցի, թե ինչ է անունը: Ասաց՝ Վահե: Ուզում էի անպայման իմանալ անունը, քանի որ աշխարհը փոքր է, եւ մի օր կարող էի նորից տեսնել նրան»,- հիշում է Էրիկը:
Վահեն եւ Էրիկը շուտով նորից են հանդիպում: Մարտակերտի հոսպիտալից Էրիկին Ստեփանակերտ են տեղափոխում, այնտեղից էլ՝ Երեւան: Վահեն այդ ընթացքում մի քանի անգամ տեսակցության է գալիս, ուզում է իմանալ՝ ինչպես է Էրիկը: Ավելին, նրանք ընկերանում են. հիմա կանոնավոր կերպով զանգահարում են իրար, իսկ մի անգամ դեռեւս հաշմանդամի սայլակով տեղաշարժվող Էրիկը նույնիսկ այցելում է Վահեին եւ ծանոթանում նրա կնոջ ու երեխաների հետ:
«Վահեն ինձ համար եղբայր դարձավ, նրա հետ արդեն մի ընտանիքի նման ենք»,- ասում է Էրիկը:
Երեւանում Էրիկը երկու վիրահատության է ենթարկվել: Վիրաբույժները կարել են վնասված անոթը, վերականգնել ձախ ոտքի վնասված նյարդերը:
Էրիկի հարազատ եղբայրը՝ Էդուարդ Մաթեւոսյանը, նույնպես բուժվում է զինվորական հոսպիտալում, նրա հետ նույն հիվանդասենյակում է: Էդուարդն ապրիլի 4-ի մարտական գործողությունների ժամանակ ձեռքի բեկորային վիրավորում է ստացել: Ձեռքի ոսկորները չեն վնասվել, սակայն 9 ջիլ եւ 2 նյարդ է վնասվել: Հոսպիտալում երիտասարդի ձեռքը վիրահատել են, եւ վերքն աստիճանաբար լավանում է: Էդուարդը դեռեւս չի կարողանում լիարժեք գործածել ձեռքը, բայց վստահ է, որ ձեռքի շարժունակությունը, ինչպես վիրաբույժներն են խոստացել, կվերականգնվի:
(լուսանկարում՝ Էրիկ եւ Էդուարդ Մաթեւոսյաններ)