Բունդեսթագում Հայոց ցեղասպանության բանաձեւի մասին քննարկումներից առաջ Թուրքիան նորից սկսել է ճնշում գործադրել Գերմանիայի վրա: Գերմանիայի կանցլեր Անգելա Մերկելի հետ հեռախոսազրույցի ընթացքում Թուրքիայի վարչապետ Բինալի Յըլդըրըմը քննադատել է «անհիմն եւ անարդարացի քաղաքական որոշումները», գրում է Spiegel-ը:
Մայիսի 30-ի երեկոյան Գերմանիայի կանցլերի նախաձեռնությամբ հեռախոսազրույց է կայացել Թուրքիայի վարչապետ Բինալի Յըլդըրըմի հետ. Մերկելը ցանկանում էր նրան շնորհավորել կառավարության ղեկավարի պաշտոնում նշանակվելու կապակցությամբ: Յըլդըրըմը հեռախոսազրույցի ընթացքում հայտնել է, որ Թուրքիայի կառավարությունը, ողջ երկիրն ու Գերմանիայի միլիոնավոր թուրքերը մտահոգված են իրադարձությունների զարգացմամբ: «Անկարան Գերմանիայի կառավարությունից եւ Բունդեսթագից հարգալից դիրքորոշում է սպասում»,- ասել է Թուրքիայի վարչապետը:
Հիշեցնենք, որ հունիսի 2-ին Բունդեսթագը կքվեարկի ՔԴՄ/ՔՍՄ կոալիցիայի, սոցիալ-դեմոկրատական կուսակցության ու Կանաչների ներկայացրած բանաձեւի հարցով, որը 101 տարի առաջ Օսմանյան կայսրությունում հայերի ու մյուս քրիստոնյաների ջարդերը ցեղասպանություն է որակում: