Թյուրքալեզու երկրները պետք է լինեն նույնքան համախմբված, որքան ԵՄ երկրները: Այս մասին հայտարարել է Թուրքիայի ԱԳ նախարար Ահմեդ Դավութօղլուն, հոկտեմբերի 2-ին Ղրղըզստանում «Ազգամիջյան երկխոսություն. համաձայնություն եւ հանդուրժողականություն» կոնֆերանսի ժամանակ:
Դավութօղլուն հայտնել է, որ Թուրքիան Ղրղըզստանին է հատկացրել 21 մլն դոլար, որի մի մասն ուղղվելու է Օշ եւ Ջալալաբադ քաղաքների վերականգնմանը: Նրա խոսքով, Ղրղըզստանի տնտեսության վիճակը շտկելու համար անհրաժեշտ են ներդրումներ դրսից, սակայն քանի դեռ չկա կայունություն, ներդրումներ չեն լինի: Թուրքիայի ԱԳ նախարարը նշել է նաեւ, որ Թուրքիան պատրաստ է աջակցել Ղրղըզստանին գյուղատնտեսության եւ այլ ոլորտներում, հաղորդում է АКИPress-ը:
Ըստ նրա, թուրքական կողմը մտադիր է նպաստել Ղրղըզստանում «Մանաս» բազայում նոր կրթական հաստատությունների բացմանը: «Մենք անուշադրության չենք մատնի թյուրքալեզու երկրներին»,- ամփոփել է Դավութօղլուն:
Այդ կոնֆերանսին մասնակցում են Ղրղըզստանի նախագահ Ռոզա Օթունբաեւան, փոխվարչապետ Ուկտոմխան Աբդուլաեւը, Թուրքիայի ներկայացուցիչներ, Ջալալաբադի, Աբադի եւ Օշի շրջանների բնակիչներ, կրոնական կազմակերպությունների եւ ուժային մարմինների ներկայացուցիչներ:
