Երեւանի կենտրոնում հունիսի 1-ին, ծեծկռտուքի ժամանակ սպանված տղամարդը նաեւ այն տաքսի ծառայության տնօրենն է, որի մեքենաներից մեկի ղեկին եղել է դեպքի ժամանակ:
Մահացածի հարեւանները NEWS.am-ի հետ զրույցում ասացին, որ արդեն մեկ տարուց ավելի է՝ Արսեն Խանամիրյանը հիմնել էր տաքսի ծառայությունը, որի սեփականատերը լինելուց բացի նաեւ որպես վարորդ էր:
Արսեն Խանամիրյանը, հարեւանների խոսքով, սովորական ընտանիքից էր, ոչ մեկի հետ խնդիրներ չուներ: Նա ապրում էր մոր, հոր, եղբոր, կնոջ եւ 3 անչափահաս երեխաների հետ: Նա Հայաստանի ֆուտբոլի հավաքականի նախկին անդամ էր:
Ավելի վաղ NEWS.am-ը տեղեկացրել էր, որ Երեւանի կենտրոնում այսօր՝ հունիսի 1-ին ծեծելով սպանել են տաքսու վարորդ, 48-ամյա Արսեն Խանամիրյանին։ «Նիվայի» վարորդի ու տաքսու վարորդի միջեւ վիճաբանություն է տեղի ունեցել, ինչից հետո տաքսու վարորդը դանակահարվել է, տեղափոխվել հիվանդանոց, որտեղ էլ մահացել է գիտակցության չգալով: Ավելի ուշ Երեւանի բնակիչ, 26-ամյա Վահրամ Վերանյանը մեղայականով ներկայացել է ոստիկանություն: Նա պատմել է, որ իջնելով մեքենայից՝ իր մոտ եղած դանակով հարվածներ է հասցրել տաքսու վարորդ 48-ամյա Արսեն Խանամիրյանին։