Թուրքիայի ԱԳ նախարար Մեւլութ Չավուշօղլուն Բունդեսթագում Հայոց ցեղասպանությունը ճանաչող բանաձեւի ընդունումից հետո Գերմանիային վիրավորող գրառում է կատարել Twitter–ում։
«Իրենց պատմության սեւ էջերը փակելու ճանապարհը խորհրդարանի անպատասխանատու որոշումներով ուրիշ երկրների պատմությունը սեւացնելը չէ»,–գրել է Մեւլութ Չավուշօղլուն։
Նշենք, որ հունիսի 2–ին Գերմանիայի խորհրդարանն ընդունեց Հայոց ցեղասպանությունը ճանաչող բանաձեւը, որտեղ նշվում է, որ Բունդեսթագը խոնարհվում է 101 տարի առաջ Օսմանյան կայսրությունում հարկադիր տեղահանության եւ ջարդերի ենթարկված հայերի եւ մյուս քրիստոնյա փոքրամասնությունների առջեւ: Բանաձեւում նաեւ նշվում է, որ Բունդեսթագը ցավում է, որ ժամանակին Գերմանիայի կառավարությունը ոչինչ չի ձեռնարկել՝ կանգնեցնելու մարդկության դեմ հանցանքը, որի համար Բունդեսթագն ընդունում է Գերմանիայի պատմական պատասխանատվությունը։
