Թուրքական մամուլը սկսել է դավաճանի պիտակավորումներով ներկայացնել Գերմանիայի խորհրդարանի դիմաց հայերի հետ հավաքված քրդերին։

Թուրքական մամուլում շրջանառվում են տեսանյութեր ու լուսանկարներ, որոնցում երեւում են Թուրքիայի քրդական «Ժողովուրդների դեմոկրատական» կուսակցության դրոշները Հայաստանի եռագույն դրոշի հետ ծածանվելիս։

Նշենք, որ Գերմանիայի խորհրդարանում Հայոց ցեղասպանության բանաձեւի քվեարկության ժամանակ խորհրդարանի դիմաց հավաքված հայերից բացի եղել են նաեւ քրդեր, ասորիներ եւ հույներ։

Հիշեցնենք, որ հունիսի 2–ին Գերմանիայի խորհրդարանն ընդունեց Հայոց ցեղասպանությունը ճանաչող բանաձեւը, որտեղ նշվում է, որ Բունդեսթագը խոնարհվում է 101 տարի առաջ Օսմանյան կայսրությունում հարկադիր տեղահանության եւ ջարդերի ենթարկված հայերի եւ մյուս քրիստոնյա  փոքրամասնությունների առջեւ: Բանաձեւում նաեւ նշվում է, որ Բունդեսթագը ցավում է, որ ժամանակին Գերմանիայի կառավարությունը ոչինչ չի ձեռնարկել՝ կանգնեցնելու մարդկության դեմ հանցանքը, որի համար Բունդեսթագն ընդունում է Գերմանիայի պատմական պատասխանատվությունը։