Երեւանի կենտրոնական զինվորական հոսպիտալում դեռեւս 2 ծանր վիրավորված զինծառայող կա, որոնք հասարակության ուշադրության կարիքն ունեն: Այս մասին հունիսի 3-ին լրագրողների հետ հանդիպմանն ասաց Երեւանի ավագանու խորհրդի անդամ Անահիտ Բախշյանը:
Նրա խոսքով, ինքը հիմնականում գործ է ունեցել «Էրեբունի» ԲԿ-ում բուժում ստացող վիրավորների հետ (Արման Լազգիյան, Ռուբեն Առաքելյան, Էրիկ Բաբայան եւ Վալերի Մեհրաբյան), այդ պատճառով նրանց մասին ավելի շատ տեղեկություններ ունի: Բայց դա չի նշանակում, որ մյուս հիվանդանոցներում ծանր վիրավորված զինծառայողներ չկան:
Անահիտ Բախշյանի տեղեկացմամբ, կենտրոնական զինվորական հոսպիտալում առնվազն 2 ծանր վիրավոր կա, սակայն նրանց մասին, չգիտես ինչու, քիչ են խոսում: Ապաքինվելու ի՞նչ հույսեր կան: Որտե՞ղ եւ ինչպե՞ս է շարունակվելու բուժումը: Ի՞նչ են ուզում նրանց համար ծնողները:
Հիշեցնենք, որ ներկայում զինվորական հոսպիտալում բուժում է ստանում 21-ամյա տանկիստ Դանիել Դավթյանը, որը ծանր վիրավորում է ստացել. պայթած արկի բեկորը նրա ուղեղին է դիպել: Հենց վերակենդանացման բաժանմունքում նրան մկրտելուց կարճ ժամանակ անց երիտասարդը դուրս է եկել կոմայից եւ սկսել է ապաքինվել: Հիմա արդեն սովորական հիվանդասենյակում է: Իհարկե, վնասվածքից հետո առայժմ չի կարողանում շարժել ձախ ձեռքը եւ ոտքը: Մյուս վերքերը բուժելուց հետո Դանիելին կուղարկեն Կարմիր Խաչի վերականգնողական կենտրոն:
Հոսպիտալի վերակենդանացման բաժանմունքում է նաեւ 21-ամյա զինծառայող Հովհաննես Պողոսյանը, որը երկու անգամ է վիրավորվել: Առաջին անգամ վիրավորումը թեթեւ է եղել, եւ նա, չսպասելով լիարժեք առողջանալուն, դիրքեր է վերադարձել: Իսկ երկրորդ անգամ գլխի շրջանում հրազենային վիրավորում է ստացել: Մարտակերտի հոսպիտալում վիրահատելուց հետո նրան Ստեփանակերտ են տեղափոխել, այնտեղից էլ՝ Երեւան: Վերջին տվյալներով, երիտասարդը երկու վիրահատության է ենթարկվել, բայց դեռեւս կոմայի մեջ է: