Հունիսի 4-ի գիշերը Վանաձորի Հարկային տեսչության շենքի դիմաց տեղի ունեցած պայթյունի դեպքով հարուցվել է քրեական գործ: Ինչպես NEWS.am-ին տեղեկացնում են Հհ Քննչական կոմիտեի մամուլի ծառայությունից, քրեական գործը հարուցվել է ՔՕ.185-րդ հոդված 2-րդ կետի 1-ին մասով՝ Գույքը դիտավորությամբ ոչնչացնելը կամ վնասելը, որը կատարվել է հրկիզման, պայթյունի կամ հանրավտանգ այլ եղանակով, պատժվում է ազատազրկմամբ՝ երկուսից հինգ տարի ժամկետով եւ տուգանքով՝ նվազագույն աշխատավարձի առավելագույնը հիսնապատիկի չափով կամ առանց դրա:
Ավելի վաղ տեղեկացրել էինք, հունիսի 4-ի գիշերը ժամը 01:10-ին ոստիկանության Տարոնի բաժին ահազանգ է ստացվել, որ Հարկային տեսչության շենքի դիմաց պայթյուն է եղել, ինչի հետեւանքով վնասվել է շենքի ճակատային մասում տանիքի մի հատվածը, մուտքի դռան ապակիները ջարդվել են: Պարզել է, որ գործող հարկային տեսչության դռան աղբամանում տեղադրված անհայտ իրի պայթյունի հետեւանքով է շենքը վնասներ կրել:
Նշանակվել են մի շարք փորձաքննություններ, նախաքննությունը շարունակվում է:
