Հայաստանի տարբեր մարզերում այսօր՝ հունիսի 4-ին, տաղացած կարկուտը վնասել է որոշ գյուղերի բերքը: NEWS.am-ի հետ զրույցում Արմավիրի մարզի Մրգաստան գյուղի գյուղապետ Ռաֆիկ Խաչատրյանը նշեց, որ գյուղում տեղացած խոշոր կարկուտի հետեւանքով վնասվել է լոբին, կարտոֆիլը եւ ցորենը. «Պոպոքի չափ կարկուտ տեղաց, գյուղի մի մասում տեղացել է, մի հատվածում չի եկել, բայց լավ վնաս է հասցրել լոբուն, ցորենին ու կարտոշկային»:
Մեզ հետ զրույցում Արմավիրի մարզի Քարակերտ գյուղի գյուղապետն էլ նշեց՝ չնայած իրենց գյուղում փոքր կարկուտ է տեղացել, սակայն, վնասել է ծիրանենու բերքը. «Շատ քիչ ու փոքր չափսի կարկուտ եկավ, բայց որոշ չափով վնասել է ծիրանենին: Այս պահին դաշտում ենք, նայում ենք՝ ինչ վնասներ է հասցրել»,-ասաց Մհեր Հարթենյանը:
Կարկուտը վնասներ է հասցրել նաեւ Արարատի մարզի Տափերական գյուղում՝ վնասվել են բերքատու ծառերը՝ ծիրանենին, խնձորենին եւ այլն եւ վարունգի բերքը:
Ավելի վաղ տեղեկացրել էինք, որ այսօր Երեւանում եւ Հայաստանի որոշ գյուղերում խոշոր կարկուտ է տեղացել:
