Google ընկերությունն իր ինքնակառավարվող մեքենաների թեստային նախատիպերին սովորեցրել է ձայնային ազդանշաններ արձակել երթեւեկության մյուս մասնակիցներին տարբեր իրավիճակներում նախազգուշացնելու համար: Այս մասին ասված է ընկերության՝ ինքնակառավարվող մեքենաների արտադրությամբ զբաղվող ստորաբաժանման ամենամսյա հաշվետվության մեջ, փոխանցում է Motor-ը:
Մշակման փուլում Google-ի նախատիպերը ձայնային ազդանշաններ էին արձակում միայն մեքենայի ներսում: Այն պահին, երբ էլեկտրոնային մեքենան կարծում էր, որ ձայնային ազդանշան է անհրաժեշտ, ներսում ձայն էր հնչում, իսկ ընկերության մասնագետները ֆիքսում էին այդ պահը: Դրանից հետո ընկերությունը վերլուծություն էր անցկացրել եւ պարզել, թե արդյոք մեքենան ժամանակին է արձակել այդ ազդանշանները:
Google-ում ազդանշանների համար մի քանի ծրագիր են գրել: Օրինակ, եթե իրադրությունը կրիտիկական չէ, մեքենան մի քանի կարճ ձայն է արձակում:
Եթե իրադրությունը անհապաղ պահանջում է երթեւեկության մյուս մասնակցին տեղյակ պահել, Google-ի մեքենան ավելի բարձր եւ երկարատեւ ձայն է արձակում: