74 տարեկանում մահացել է ամերիկացի լեգենդար բռնցքամարտիկ Մուհամեդ Ալին: Ռինգի արքան երկար տարիներ տառապում էր Պարկինսոնի հիվանդությամբ: 20-ամյա կարիերայի ընթացքում Ալին հաղթել է 56 մենամարտերում: Օլիմպիական չեմպիոն, պրոֆեսիոնալ բռնցքամարտի ծանր քաշային կարգի աշխարհի բազմակի չեմպիոն՝ Մուհամեդ Ալին մի շարք վարկածներով ճանաչվել է 20-րդ դարի լավագույն մարզիկ ու բռնցքամարտիկ:
Երեւանում հունիսի 4-ի երեկոյան ուժեղ կարկուտ է տեղացել: Շուրջ 5 րոպե տեւած կարկուտի հատկիներն այնքան խոշոր էին, որ վնասվել են բազմաթիվ մեքենաներ: Արմավիրի եւ Արարատի որոշ գյուղերում կարկուտը մեծ վնասներ է հասցրել լոբու, կարտոֆիլի, վարունգի, ցորենի ցանքերին, նաեւ պտղատու ծառերին, այդ թվում՝ ծիրանենիներին:
Ֆրանսիայում չորս օր չդադարող հորդառատ անձրեւների պատճառով Սենայում ջրի մակարդակը հասել է վերջին 35 տարվա մեջ ռեկորդային բարձրության ՝ նորման գերազանցելով ավելի քան 4 մետրով, երկրով մեկ ջրհեղեղներ են սկսվել: Փարիզում փակվել են մետրոյի որոշ գծեր, նաեւ Լուվրի, Օրսեի թանգարանները, որպեսզի անհրաժեշտության դեպքում հնարավոր լինի արագ դուրս բերել արժեքավոր ցուցանմուշները: Երկրի 26 դեպարտամենտներում հայտարարված է տագնապի բարձր մակարդակ: Չորս մարդ մահացել է, 5000-ից ավելի մարդ տարհանվել է:
Ամերիկյան Թեքսաս նահանգում ջրհեղեղների հետեւանքով զոհվածների թիվը հասել է 12-ի: Ջրի մակարդակը Բրազոս գետում անձրեւների պատճառով հասել է վերջին 100 տարվա մեջ առավելագույնին: Իշխանությունները տարհանել են առափնյա մի քանի շրջանների բնակիչներին, ստիպված են եղել տարհանել նաեւ երեք բանտերի բանտարկյալներին:
Հունիսի 4-ի գիշերը պայթյուն է տեղի ունեցել Վանաձորի Հարկային տեսչության շենքի մոտ: Քննչականը պարզել է, որ տեսչության դռան մոտ աղբամանում տեղադրված անհայտ իր է պայթել: Քրեական գործը հարուցվել է գույքը դիտավորությամբ ոչնչացնելու հոդվածով: Պայթյունի հետեւանքով վնասվել է շենքի ճակատային մասում տանիքի մի հատվածը, մուտքի դռան ապակիները ջարդվել են:
Դժբախտ պատահար է տեղի ունեցել Սյունիքի մարզի Սառնակունք գյուղում: 22-ամյա երիտասարդը ընկել է գյուղի ջրամբարն ու մահացել: Նա Սառնակունքի գյուղապետի որդին էր: Ինչ հանգամանքներում է դեպքը տեղի ունեցել, դեռ պարզ չէ:
Հունիսի 3-ին հրազենային վիրավորումից մահացել է Արմավիրի մարզի Մրգաստան գյուղի բնակիչ, 59-ամյա Վահան Գրիգորյանը: Հորը գտել է նրա 32-ամյա որդին՝ Արտակ Գրիգորյանը, որը գեներալ պատգամավոր մանվել Գրիգորյանի վարորդն է: Վահան Գրիգորյանն ընկած է եղել Էջմիածին քաղաքի «Մատուռ» կոչվող տարածքի հարակից դաշտում՝ կողքին՝ նրան պատկանող «Մակարով» ատրճանակը` լիցքավորված 6 փամփուշտով: Հենց որդին էլ հորը հասցրել է հիվանդանոց, որտեղ վերջինը գիտակցության չգալով մահացել է: Ինչ հանգամանքներում է արձակվել կրակոցը, դեռ չի պարզվել:
Նոր մանրամասներ են հայտնի դարձել Երևանի կենտրոնում տաքսու վարորդի սպանության գործով: Լրատվամիջոցներում շրջանառվում է վարկածը, որ 48-ամյա Արսեն Խանամիրյանի եւ նրա սպանության մեջ մեղադրվող 26-ամյա Վահրամ Վերանյանի միջեւ հին վեճ է եղել՝ կնոջ պատճառով: Վահրամ Վերանյանը նախկինում վարորդ է աշխատել Խանամիրյանին պատկանող «Ֆուտբոլ» տաքսի ծառայությունում: Նրանք երկար տարիներ լարված հարաբերությունների մեջ են եղել՝ մի կնոջ հետ մտերմիկ հարաբերությունների պատճառով։ Հիշեցնենք, որ Արսեն խանամիրյանը սպանվել էր հունիսի 1-ին Չարենց, Նար Դոս և Վարդանանց փողոցների խաչմերուկում: Վահրամ Վերանյանը խոստովանական ցումունք է տվել:
Պաշտոնական դիրքերը չարաշահելու համար ձերբակալված գեներալ-մայոր Մելս Չիլինգարյանը տեղափոխվել է Երեւանի կայազորային հոսպիտալ: Նրա առողջական վիճակի մասին առայժմ մանրամասներ չեն հաղորդվում: ԶՈւ սպառազինության վարչության նախկին պետը կալանավորված է: Նա մեղադրվում է իշխանությունը չարաշահելու եւ անգործության մեջ, որն առաջացրել է ծանր հետեւանքներ:
Վերջին երկու օրերին Հալեպի հայկական թաղամասերը ակտիվ հրթիռակոծում են թուրք զինյալները, ինչի պատճառը Գերմանիայի խորհրդարանի կողմից Հայոց Ցեղապանությունը ճանաչող բանաձեւի ընդունումն է՝ համոզված է Սիրիայի հայկական համայնքը: Հրթիռակոծման հետեւանքով 4 հայ է զոհվել, տասնյակ վիրավորներ կան, ավերվել են մի քանի շինություններ, այդ թվում՝ հայկական Սուրբ Երրորդություն եկեղեցին:
Թուրքիայի արձագանքը Հայոց ցեղասպանությունը ճանաչելու մասին Բունդեսթագի որոշմանը համարժեք չէ՝ ասել է Ռուսաստանի արտգործնախարար Սերգեյ Լավրովը: «Կարծում եմ՝ իրականում այս ամենի պատճառն այն է, որ Թուրքիան չի ուզում իսկապես գործընկեր լինել մի շարք հարցերում, քանի որ փորձում է պարբերաբար սկանդալներ սարքել, վիրավորել իր գործընկերներին՝ այդ թվում Եվրոպային»,- ասել է Լավրովը: Նրա խոսքով՝ Ռուսաստանը տեղյակ է եղել, որ Բուդեսթագում պատրաստվում է նման քվեարկություն, սակայն միայն ամենավերջին պահին:
Նախօրեին Ռուսաստանի պաշտպանության նախարարության անօդաչու սարքը Սիրիայում բեռնատարների շարասյուն է նկարահանել, որը Թուրքիայից ուղեւորվում է Հալեպ եւ Իդլիբ նահանգներում գտնվող ահաբեկիչների դիրքերի ուղղությամբ: Ռուսական կողմը, սակայն, ստույգ տեղեկություն չունի այն մասին, թե ինչ կա բեռնատարներում: Ենթադրվում է, որ դրանցով տեղափոխում են զինյալների կամ զենք:
Այսօր բոլոր հիմնական արտարժույթների փոխարժեքներն աճել են, դոլարինը կազմել է 477, ռուբլունը՝ 7,1, եվրոյինը՝ 534, իսկ ֆունտինը՝ 682 դրամ:
Երեւանում հունիսի 5-ին, երեկոյան ժամերին ժամանակ առ ժամանակ հնարավոր է կարճատեւ անձրեւ: Առաջիկա գիշերը մայրաքաղաքում օդի ջերմաստիճանը կհասնի +16-ի , իսկ վաղը ցերեկը՝ +30-ի: