Ռասիզմի եւ անհանդուրժողականության դեմ պայքարի հարցերի եվրոպական հանձնաժողովը հունիսի 7-ին Ադրբեջանի մասին նոր զեկույց է հրապարակել:
Զեկույցում հանձնաժողովը մտահոգություն է հայտնում ատելության լեզվի օգտագործման, անկախ քաղաքացիական հասարակության եւ լրատվամիջոցների նկատմամբ ճնշումների, ԼԳԲՏ-հանրության մասին կանխակալ կարծիքի եւ կրոնական փոքրամասնոթյունների հանդեպ խտրականության կապակցությամբ:
«Քաղաքական առաջնորդները, կրոնական հաստատություններն ու լրատվամիջոցները շարունակում են հայերի նկատմամբ ատելություն սերմանող լեզու օգտագործել: Ադրբեջանցիների մի ամբողջ սերունդ է մեծացել՝ լսելով այդ հռետորաբանությունը: Հայաստանի հետ հաշտեցմանն ուղղված գործընթացներում ներգրավված ակտիվիստները վիճելի մեղադրանքներով ազատազրկման են դատապարտվել, եւ մտահոգություն կա, որ ատելության լեզու է օգտագործվել նաեւ թալիշների նկատմամբ»,- ասված է զեկույցում:
Հանձնաժողովն իշխանություններին կոչ է անում ապահովել, որպեսզի պետական պաշտոնատար անձինք զերծ մնան հայերի հանդեպ ատելության հրահրումից եւ համարժեք պայմաններ ստեղծեն՝ բազմազան եւ անկախ քաղաքացիական հասարակության զարգացման համար: Բացի այդ, ընդգծվում է, որ հայ սպայի սպանության համար Բուդապեշտում ցմահ ազատազրկման դատապարտված Ռամիլ Սաֆարովին ներման շնորհումը եւ ծառայողական առաջընթացը նպաստում են ռասայական հողի վրա հանցագործություններ իրականացնող անձանց անպատժելիության զգացողության խրախուսմանը: Հանձնաժողովն Ադրբեջանի իշխանություններին հորդորում է վերջ դնել ատելության մշտական հռետորաբանությանը:
Ադրբեջանը խտրականության դեմ պայքարի համապարփակ օրենսդրություն չի ընդունել, եւ չկան հաստատություններ, որոնք պատասխանատու են մասնավոր հատվածում ռասիզմի եւ խտրականության կանխման եւ դրանց դեմ պայքարի համար: