Մոսկվային նյարդայնացրել է Գարեգին Նժդեհի արձանի տեղադրումը Երեւանի կենտրոնում:Ռուսաստանի ԱԳՆ պաշտոնական ներկայացուցիչ Մարիա Զախարովան հայտարարել է, որ զարմացած է այդ փաստից, քանի որ, նրա բնորոշմամբ, Նժդեհը Վերմախտի «Հայկական լեգեոնի» հիմնադիրներից մեկն է, իսկ նրա արձանի տեղադրումը Երեւանում՝ նացիզմի, նեոնացիզմի, ծայրահեղականության հերոսացում:
Ժիրայր Սեֆիլյանը «Ազգային դիմադրության կոմիտե» է ստեղծում, որի շրջանակում չի բացառում համագործակցությունը նաեւ Արցախի պաշտպանության նախկին նախարար Սամվել Բաբայանի հետ:Սեֆիլյանի խոսքով՝ ժողովուրդը պետք է մոբիլիզացնի բոլոր ռեսուրսները, քանի որ իշխանությունը, նրա բնորոշմամբ, հանցավոր անգործության է մատնված: Ինչ վերաբերում է վերջերս Հայաստան վերադարձած Սամվել Բաբայանին, Սեֆիլյանի կարծիքով՝ իշխանությունը նրան ժամանակին չպետք է թույլ տար հեռանալ Հայաստանից:
Ապրիլյան պատերազմում վիրավորված Ռուբեն Առաքելյանը հունիսի 13-ին կտեղափոխվի Գերմանիա: Ռուբենին նախ Մոսկվա կտեղափոխեն, այնտեղից էլ՝ Դյուսելդորֆ, որտեղ նրան կդիմավորի Բոննի համալսարանին առընթեր կլինիկայի ռեանիմոբիլը: 19-ամյա Ռուբենը, որը ծնողների միակ զավակն է, ողնաշարի ծանր վիրավորում էր ստացել, ինչից հետո նրա վերջույթները գրեթե անշարժ են: Սակայն գերմանացի բժիշկները ասել են, որ ամենայն հավանականությամբ հնարավոր կլինի գոնե մասամբ վերականգնել վերջույթների շարժունակությունը:
58-ամյա Եղիշե Խաչատրյանի մայրը, որի աչքի առջեւ սպանել են որդուն, առերեսվել է մեղադրյալ՝ 26-ամյա Խաչիկ Կոսյանի հետ, եւ հաստատել, որ հենց նա է եղել որդուն ծեծողներից մեկը: Մյուս հետախուզվողներին էլ 75-ամյա կինը ճանաչել է լուսանկարներով: Կնոջ պատմելով՝ կռիվը հրահրել է հենց հետախուզման մեջ գտնվող Արտաշես Չիչոյանը: Տիկին Ասյան օգնություն է կանչել, քիչ անց տեսել է, որ երեք հոգի մոտենում են, սակայն օգնելու փոխարեն նրանք հրել են կնոջը եւ սկսել են բութ գործիքով ու ոտքերով հարվածել Եղիշեին: Մինչդեռ Խաչիկի հայրը վստահեցնում է, որ իր որդին այդ օրը ծեծկռտուքին չի մասնակցել, ոչ էլ ականատես է եղել: Նրա խոսքով, Խաչիկն այդ պահին եղել է ավտոսպասարկման կետում` դեպքի վայրից 60 մետր հեռու եւ հասել է այն պահին, երբ Եղիշեն մահացած է եղել: Նշենք, որ Խաչիկ Կոսյանի հայրը արդարադատության փոխգնդապետ է, իսկ Խաչիկը՝ ԴԱՀԿ ծառայության աշխատակից, նրա գործն ուղարկվել է ՀՔԾ:
Արտառոց դեպք է գրանցվել «Էրեբունի» բժշկական կենտրոնում: Հիվանդանոց է դիմել 58-ամյա տղամարդ՝ ճճվակալած վերքերով: Գեւորգ Կոշկերյանը ընդունվել է ծանր վիճակում, միանգամից տեղափոխվել վերակենդանացման բաժանմունք: Նրա ձախ նախաբազի խոր վերքը եղել է ինֆեկցված ու ճճվակալած: Տղամարդու պատմելով՝ մի քանի օր առաջ իրեն ծեծի են ենթարկել, հարազատները նրա տեղը չեն իմացել, երեք օր անց գտել են խոշտանգված, անգիտակից, ծայրահեղ ծանր վիճակում եւ տեղափոխել հիվանդանոց: «Էրեբունի» հիվանդանոցում ասում են՝ նման վերքերով հիվանդ նախկինում չեն ունեցել:
Սպանվել է ամերիկացի երգչուհի Քրիստինա Գրիմմին: Ամերիկյան The Voice նախագծից հայտնի դարձած երգչուհին մահացել է հրազենային վիրավորումից: Օռլանդոյում համերգից հետո երգչուհին ինքնագրեր է բաժանել, երբ նրան մոտեցել է անհայտ տղամարդ, կրակել նրա վրա, ապա ինքնասպան եղել:
Երեւանի Կասյան փողոցի հարակից տարածքում բացվել է գյուղատնտեսական մթերքների ավանդական տոնավաճառը, որտեղ ամեն շաբաթ եւ կիրակի օր գյուղացիները կարող են առանց տեղի համար վարձ տալու վաճառել իրենց գյուղմթերքը: Շուկայի առաջին այցելուներից էին գյուղատնտեսության նախարար Սերգո Կարապետյանը եւ քաղաքապետ Տարոն Մարգարյանը: Նրանք շրջել են տոնավաճառում, գնումներ կատարել: Սերգո Կարապետյանը ծանոթանալով մթերքի գնին` գյուղացիներին հորդորել է ավելի էժան վաճառել դրանք: Գյուղացիները համաձայն չեն, որ գինը բարձր է: Նրանց խոսքով՝ ցրտահարության եւ կարկուտի պատճառով այս տարի բերքն ավելի քիչ է, սակայն քանի որ թանկ չի վաճառվում, ստիպված են ցածր գնով վաճառել:
Եվրո 2016-ի բացման օրը բախումներ են տեղի ունեցել երկրպագուների միջեւ: Ֆրանսիայի Մարսել քաղաքում Անգլիայի հավաքականի ֆանատները բախվել են նախ ոստիկանների, ավելի ուշ՝ ռուս երկրպագուների հետ: Ձերբակալել են տասնյակ ֆանատներ: Նշենք, որ առաջին խաղում Անգլիայի հավաքականը մրցելու է ռուսների հետ:
Այսօր աճել է միայն դոլարի փոխարժեքը, մյուս երեք հիմնական արտարժույթներինը՝ նվազել է: Այսպիսով, դոլարի փոխարժեքը կազմել է 478, ռուբլունը՝ 7.38, եվրոյինը՝ 538, ֆունտինը՝ 686 դրամ:
Երեւանում հունիսի 12-ին առանց տեղումների եղանակ է սպասվում: Առաջիկա գիշերը մայրաքաղաքում օդի ջերմաստիճանը կհասնի +14-ի, իսկ վաղը ցերեկը՝ +30-ի: