Pulse գեյ ակումբի այցելուները , որտեղ լույս կիրակի գիշերը 49 մարդ է սպանվել, առաջ էլ էին այնտեղ տեսել Օմար Մատինին: Այս մասին հայտարարել է ակումբի մշտական հաճախորդներից առնվազն չորսը, հայտնում է Orlando Sentinel պարբերականը:
«Երբեմն նա անկյունում նստում էր ու մենակ խմում , իսկ երբեմն էլ այնքան շատ էր խմում, որ սկսում էր աղմուկ բարձրացնել ու ագրեսիվ դառնալ»,- պատմել է ակումբի հաճախորդներից մեկը: Նրա խոսքով Մատինը առնվազն տասը անգամ եղել է այդ ակումբում:
Տղամարդը հավելել է, որ այցելուները քիչ են շփվել Մատինի հետ, ընդ որում Մատինը նրանց պատմում էր իր ընտանիքի՝ հոր, կնոջ ու երեխայի մասին:
Օռլանդոյի գեյ ակումբում հրաձգության հետեւանքով 49 մարդ է զոհվել ու 53-ը վիրավորվել: Հարձակվողը Ֆլորիդայի բնակիչ Օմար Մատինն էր՝ ծագումով աֆղանցի: Ոստիկանները գրոհի ժամանակ սպանել էին նրան: Կատարվածը զոհերի քանակով խոշորագույն նման հանցագործությունն էր ԱՄՆ պատմության մեջ: