Հայաստանի Ազգային ժողով այսօր՝ հունիսի 15-ին, իր նիստում 68 կողմ, 21 դեմ 18 ձեռնպահ ձայների հարաբերակցությամբ առաջին ընթերցմամբ ընդունեց Հարկային նոր օրենսգիրքը։
Քվեարկությունից առաջ անկախ պատգամավոր Էդմոն Մարուքյանը նշեց, որ Հարկային նոր օրենսգիրքը ԱԺ է բերվել օրենքի խախտմամբ, քանի որ փոքր ու միջին բիզնեսի վրա ազդեցության գնահատականը չկա: Նա առաջարկել է հանել օրինագիծը քվեարկությունից:
ՀԱԿ խմբակցության պատգամավոր Հրանտ Բագրատյանը կոչ արեց դեմ քվեարկել, քանի որ այն ամբողջությամբ պետք է փոխել:
«Համախմբում» կուսակցության նախաձեռնող խմբի անդամ Ստեփան Մարգարյանը եւս իր ու իր 3 կուսակիցների անունից ասաց, որ հարկային այս օրենսգրքի ընդունումն անընդունելի է եւ խանգարելու է բիզնեսի զարգացմանը:
ՀԱԿ խմբակցության պատգամավոր Նիկոլ Փաշինյանն էլ նշեց, որ այս օրենսգիրքն ընդունելու պարագայում թանկանալու է գազը, դիզելային վառելիքը։ Անդրադառնալով նրան, որ իշխանությունն ուզում է արագ անցկացնել օրենքը, Փաշինյանն ասաց. «Ասում եք, հիմա չքվեարկենք՝ ուշանում է, ինչի՞ց է ուշանում, վարկերի՞ց, որ պետք է ընդունված լինի, որ միջազգային կազմակերպությունների հետ խնդիր չունենան»:
ԲՀԿ խմբակցության պատգամավոր Նաիրա Զոհրաբյանը հայտարարեց, թե ԲՀԿ կուսակցության պատգամավորները կքվեարկեն ձեռնպահ, իսկ եթե այս ընթացքում չբարելավվի, վերջնական քվեարկությանը դեմ կքվեարկեն:
«Ժառանգության» խմբակցության պատգամավոր Ռուբիկ Հակոբյանը եւս դեմ էր օրինագծի ընդունմանը: Նա առաջարկեց հանել այն քվեարկությունից:
ՀՅԴ խմբակցության ղեկավար Արմեն Ռուստամյանը էլ նշեց. «Մենք պատրաստում ենք առաջարկությունների փաթեթ ներկայացնել՝ ակնկալելով, որ լրջորեն կուսումնասիրվի։ Այս պահին ձեռնպահ ենք քվեարկում՝ հետագան կապելով, թե ինչքանով առաջարկությունները հաշվի կառնվեն»:
ՀՀԿ պատգամավոր Վարդան Այվազյանը կոչ արեց նախ քվեարկել, հետո քննարկումների միջոցով փոփոխություններ անել օրինագծում:
