Վրաստանում, ինչպես նաեւ Թուրքիայում, կրոնական փոքրամասնությունների ներկայացուցիչների իրավունքները կանոնակարգող օրենքներ չկան։ Հոկտեմբերի 5-ին լրագրողների հետ հանդիպման ժամանակ Վրաստանում հայկական եկեղեցու խնդիրների մասին խոսելիս նման գնահատական հնչեցրեց Մայր Աթոռ Սուրբ Էջմիածնի դիվանապետ Արշակ եպիսկոպոս Խաչատրյանը, հավելելով, որ ժողովրդավարության ձգտող այդ երկիրը չի պահպանում նույն այդ ժողովրդավարության նվազագույն պահանջները:
Նրա խոսքով, Վրաստանում օրենքի բացը հանգեցնում է Հայ առաքելական եկեղեցու իրավաբանական կարգավիճակ չունենալուն։ «Վրաստանի իշխանությունները առաջարկում են, որ հայկական եկեղեցիներն իրենց գործունեությունն իրականացնեն հասարակական կազմակերպությունների ձեւաչափով»,- նկատեց հոգեւորականը։
Մայր Աթոռի դիվանապետը հավաստիացրեց, որ Վրաստանում հայկական եկեղեցու իրավաբանական կարգավիճակի մասին բանակցությունները միշտ էլ առաջնահերթություն են եղել Գարեգին Բ-ի համար։ «Տարբեր առիթներով, երբ վրացի բարձրաստիճան պաշտոնյաներ են այցելել Էջմիածին, Վեհափառի կողմից խնդիրը բարձրաձայնվել է, նամակներ եւ գրություններ են փոխանակվել։ Բացի այդ, հոկտեմբերի 23-28-ին սպասվում է Վեհափառի այցը Վրաստան, ուր նա վերստին հնարավորություն կունենա ներկայացնել խնդիրը՝ ավելի շոշափելի դարձնելով հեռանկարները»։