Հարավարեւելյան ուղղությամբ տեղակայված զորամասերից մեկի մարզումների անցկացման վայրում հունիսի 17-ին մահացած հայտնաբերված 19-ամյա զինծառայող Հրանտ Գրիգորյանի մարմնի վրա կապտուկներ են եղել: Այս մասին NEWS.am-ին ասաց նրա բարեկամներից Նորիկ Ավագյանը` նշելով, որ իրենք բացառում են ինքնասպանության վարկածը:

«Թեւերի վրա կապտուկներ կային, ոտքերի վրա` հետքեր: Շրթունքը ճղված էր,  քիթը` քերված, ոտքերի վրա հետքեր կային, կրակած էր բերանի մեջ»,- ասաց Նորիկ Ավագյանը:

Բարեկամը պատմեց, որ զորավարժությունների գնալու ճանապարհին է դեպքը եղել:

«Վատ է զգացել ճանապարհին, հրամանատարին ասել է, որ վատ է, ժիլետը հանել է, թողել են ճանապարհին էդպես գնացել են: Հետո հաջորդ վաշտն է եկել, տեսել են` մահացած զինվոր կա: Ու մեզ այն է վրդովեցնում, որ անօգնական զինվորին հրամատարը թողել, գնացել է»,- ասաց բարեկամը:

Հրանտ Գրիգորյանը 11 ամսվա զինծառայող էր: Նա մասնագիտությամբ ատամնաբույժ էր, մի քանի օրից պետք է տանեին զորամաս` ֆելդշեր աշխատելու: 

Ավելի վաղ տեղեկացրել էինք, որ հունիսի 17-ին` ժամը 10:45-ի սահմանում, հարավարեւելյան ուղղությամբ տեղակայված զորամասերից մեկի մարզումների անցկացման վայրում, դեռեւս չպարզված հանգամանքներում, մահացու հրազենային գնդակային վիրավորում է ստացել զինծառայող, 1997թ. ծնված Հրանտ Գարուշի Գրիգորյանը:

Հրանտ Գրիգորյանն արմատներով Արարատի մարզի Մրգավան գյուղից է, սակայն, ընտանիքով բնակվում է Արտաշատում: Նրա հայրը Ռուսաստանում  արտագնա աշխատանքի է, ընտանիքն այնքան էլ լավ պայմաններում չի ապրում: Հրանտ Գրիգորյանն ընտանիքի միակ տղան էր, ունի իրենից փոքր քույր:

Նշենք, որ զինծառայողի մահվան դեպքով քրեական գործ է հարուցվել ինքնասպանության հասցնելու հատկանիշներով: