Զինված ուժերի հետախուզության նոր պետ է նշանակվել գնդապետ Վաղինակ Սարգսյանը: Այս որոշումը ստորագրել է Հանրապետության նախագահը:

Վաղինակ Սարգսյանը կփոխարինի Արշակ Կարապետյանին, որն ապրիլյան պատերազմից հետո ազատվել էր աշխատանքից:

Նշենք, որ մոտ 2 ամիս Զինված ուժերը մնացել էր առանց հետախուզության պետի:

Նոր մանրամասներ են հայտնի դարձել Արցախի զորամասերից մեկի մարզումների անցկացման վայրում հունիսի 17-ին զինծառայողի մահանալու դեպքի մասին: 

19-ամյա Հրանտ Գրիգորյանի հարազատները չեն հավատում նրա մահվան պաշտոնական՝ ինքնասպանության վարկածին: Զինծառայողի բարեկամներից մեկը NEWS.am-ին պատմել է, որ զինծառայողի մարմնի վրա կապտուկներ են եղել, շրթունքը պատռված է եղել, քիթը` քերված: Հարազատները տեղեկացել են, որ Հրանտը մահացել է զորավարժություններ գնալու ճանապարհին: Հրամանատարին ասել է, որ իրեն վատ է զգում, մյուսների հետ չի շարունակել ճանապարհը, հրամանատարն էլ նրան թողել է ու հեռացել:

Հրանտ Գրիգորյանն ընտանիքի միակ տղան էր, իրենից փոքր քույր ունի:

ՀՀԿ-ական պատգամավոր Աշոտ Աղաբաբյանի (Բուռնաշ) եւ հարկային մարմինների միջեւ դատական վեճը վերջապես լուծում է ստացել: Մայիսի 31-ին դատարանը պարտավորեցրել է նախկինում Պետական եկամուտների կոմիտեին վերացնել Աղաբաբյանին պատկանող «Հրազդան» ստադիոնի տնօրինությանը 60 մլն դրամով տուգանելու որոշումը: Այս մասին լրագրողների հետ զրույցում ասել է ստադիոնի տնօրեն Գագիկ Ժամհարյանը:

Հիշեցնենք, որ մարզադաշտի տնօրինությունը մեկ տարի առաջ դատարան էր դիմել` անհիմն համարելով ՊԵԿ-ի որոշումը: Նրանց պնդմամբ` ՊԵԿ-ն իրենց անհարկի էր տուգանել, երրորդ անձի հայտնած տվյալների համաձայն, իրենք տարեկան 500 միլիոն հարկ են վճարել պետությանը:

Քառօրյա պատերազմի հետեւանքով Թալիշից հեռացած տղամարդիկ մտադիր են «Թալիշ» գումարտակ կազմել` գյուղի սահմանային գոտին պաշտպանելու համար: Թալիշ գյուղի մարտական ջոկատի հրամանատար Միքայել Ապրեսյանը լրագրողների հետ հանդիպմանը հայտարարել է, որ գումարտակ կազմելու վերաբերյալ պատասխանատու մարմինների հետ արդեն համաձայնություն է ձեռք բերվել:

Հիշեցնենք, որ ապրիլի 2-ից գյուղից հեռացած թալիշցիները ժամանակավոր բնակություն են հաստատել Հայաստանի տարբեր քաղաքներում:

Ստեփանակերտում հունիսի 6-ին ծեծի ենթարկված ընդդիմադիր պատգամավոր Հայկ Խանումյանը նախօրեին հանդիպել է Արցախի նախագահ Բակո Սահակյանի հետ: Ըստ պատգամավորի՝ Բակո Սահակյանն ինքն է զանգահարել եւ առաջարկել հանդիպել:

«Հանդիպման ընթացքում Բակո Սահակյանը դատապարտել է տեղի ունեցածը եւ հավաստիացրել, որ մեղավորները կպատժվեն»,- ասել է Հայկ Խանումյանը:

Պատգամավորը նաեւ հայտնել է, որ իրեն ծեծելու գործով կալանավորվածներն այն նույն անձինք են, որոնց ինքը ճանաչել է դեպքի օրը:

Սյունիքի մարզում ամուսնության նպատակով աղջիկներ առեւանգելու ավանդույթը դեռ պահպանվել է: Օրերս Գորիսում 25-ամյա Ալիկն իր հորեղբոր որդիների օգնությամբ դատարանի շենքի մոտից առեւանգել է 18-ամյա մի աղջկա:

Աղջկա հարազատները դիմել են ոստիկանություն: 2 օր անց իրավապահ մարմինները հայտնաբերել են Ալիկին եւ ձերբակալել: Նախաքննությունը շարունակվում է:

Միացյալ Նահանգների նախագահի հանրապետական թեկնածու Դոնալդ Թրամփը ստիպված է եղել մեկ օրով դադարեցնել իր նախընտրական պայքարը. պատճառը՝ հայտնի ամերիկահայ խոհարար, ռեստորանների խոշոր ցանցի հիմնադիր Ջեֆրի Զաքարյանի դեմ Թրամփի հարուցած դատական հայցն էր:

Պարզվում է՝ ամերիկահայ խոհարարը հրաժարվել է Թրամփի նոր հյուրանոցում բացել իր ռեստորաններից մեկը, երբ լսել է Թրամփի նվաստացուցիչ հայտարարությունները մեքսիկացիների հասցեին: Նախագահի թեկնածուի կարծիքով, Զաքարյանն իր այդ քայլով իրեն տասը միլիոն դոլարի վնաս է հասցրել, որն էլ գործարարը պահանջում է հայտնի խոհարարից՝ որպես փոխհատուցում:

Այս շաբաթ դատարանում ցուցմունք է տվել անձամբ Թրամփը:

Դոլարի փոխարժեքն այսօր նվազել է, իսկ մյուս երեք արտարժույթներինը՝ աճել. դոլարի փոխարժեքը կազմել է 475, ռուբլունը՝ 7:15, եվրոյինը՝ 530, իսկ ֆունտինը՝ 674 դրամ։

Հունիսի 19-ին օդի ջերմաստիճանը Երեւանում էապես չի փոխվի.  գիշերը եւ օրվա երկրորդ կեսին սպասվում են հնարավոր է կարճատև անձրեւ: Առաջիկա գիշերը մայրաքաղաքում կդիտվի +15+17, իսկ վաղը ցերեկը՝ +25+27 աստիճան տաքություն։