Սերժ Սարգսյանը հունիսի 20-ին աշխատանքային այցով մեկնել է Սանկտ Պետերբուրգ , որտեղ Վլադիմիր Պուտինի միջնորդությամբ պետք է հանդիպեր Իլհամ Ալիեւի հետ: Օդանավակայանում Սերժ Սարգսյանը խոսել է ապրիլյան պատերազմից հետո Ադրբեջանի նախագահի հետ երկրորդ հանդիպումից իր ակնկալիքների մասին:
Երկու նախագահները նախ առանձնազրույցներ են ունեցել Վլադիմիր Պուտինի հետ: Ռուսաստանցի գործընկերոջ հետ հանդիպմանը Սերժ Սարգսյանը հույս է հայտնել, որ Ադբեջանը չի խոչընդոտի Վիեննայում ձեռք բերված պայմանավորվածությունների իրականացմանը՝ մասնավորապես սահմանային միջադեպերի հետաքննության մեխանիզմներ ներդնելու վերաբերյալ:
Իր հերթին Ալիեւը հայտարարել է՝ Ղարաբաղում ստատուս քվոն անընդունելի է, ստատուս քվոն պետք է հաղթահարել, բայց դրա համար պետք է այդ տարածաշրջանից դուրս բերել հայկական զորքերը։
Ավելի ուշ կայացել է Հայաստանի, Ռուսաստանի եւ Ադրբեջանի նախագահների եռակողմ հանդիպումը, որից հետո նախագահները հանդես են եկել համատեղ հայտարարությամբ: Նախագահները վերահաստատել են Վիեննայում մայիսի 16-ին ձեռք բերված պայմանավորվածությունները, նաեւ համաձայնել են մեծացնել հակամարտության գոտում միջազգային դիտորդների թիվը: Նրանք նաեւ գոհունակություն են հայտնել վերջին շրջանում շփման գծում հրադադարի ռեժիմի պահպանման կապակցությամբ: Նախագահները պայմանավորվել են շարունակել հանդիպումները նման ձեւաչափով:
Ձերբակալվել է Շուշիի առանձնակի գումարտակի հրամանատար Ժիրայր Սեֆիլյանը: Ազատամարտիկին կասկածում ապօրինի զենք եւ ռազմամթերք ձեռք բերելու, փոխադրելու եւ պահելու մեջ: Ըստ Քննչական կոմիտեի՝ այս ձերբակալությունը կապված է այս տարվա մայիսի 20-ի դեպքի հետ, երբ Ծիծեռնակաբերդի խճուղում վթարի ենթարկված ավտոմեքենայից ոստիկանները հայտնաբերել են ԱԿԱ-74 տեսակի երկու ինքնաձիգ՝ 120 փամփուշտներով, բերման ենթարկել վարորդին եւ ուղեւորին: Ովքեր են այդ մարդիկ, Քննչական կոմիտեն չի հաղորդում: Միայն տեղեկացնում է, որ Սեֆիլյանը, ըստ նախաքննության տվյալների, ծրագրել է մի խումբ անձանց զինված գործողություններ, նպատակ ունենալով զենքի գործադրմամբ զավթել շենքեր, շինություններ, հաղորդակցության եւ կապի միջոցներ, այդ թվում՝ Երեւանի հեռուստաաշտարակը: Ավելին՝ ըստ քննչականի, խմբի անդամները որոշ հանցավոր գործողություններ ծրագրել էին իրականացնել ապրիլյան պատերազմին հաջորդող օրերին: Նշենք, որ իրավապահները խուզարկություն են իրականացրել «Սարդարապատ», «Շուշիի առանձնակի գումարտակի ազատամարտիկների միավորում» ՀԿ գրասենյակներում , ինչպես նաեւ Ժիրայր Սեֆիլյանի տանը:
Ժիրայր Սեֆիլյանի տան եւ նկուղի խուզարկության արդյունքում զենք չեն գտել` լրագրողներին ասել է ազատամարտիկի կինը՝ Նանոր Սեֆիլյանը: Կինը վստահ է՝ հետպատերազմյան շրջանում իշխանությունների սուր քննադատությամբ հանդես եկող ամուսնու նկատմամբ քաղաքական հետապնդում է իրականացվում: Նշենք, որ քրեական գործով ութ անձի առաջադրվել է մեղադրանք, նրանցից վեցը կալանավորվել են, մեկի նկատմամբ հայտարարվել է հետախուզում: Կալանավորվածների անունները դեռ չեն հրապարակվում:
Երեւանի «Արմենիա» բժշկական կենտրոնում նորածին է մահացել: 32-ամյա Լուսինե Խշտոյանն իր երրորդ զավակին լույս աշխարհ է բերել հունիսի 3-ի երեկոյան, բժիշկները նրան վստահեցրել են, որ թեեւ երեխան պտղաջրեր է կուլ տվել, սակայն նրա մոտ ամեն ինչ նորմալ է: Հաջորդ օրն արդեն տեղեկացրել են, որ երեխայի վիճակը վատացել է եւ նա մահացել է: Ծնողները համոզված են, որ կատարվածը մանկաբույժի անփութության հետեւանք է, եւ արդեն ոստիկանություն են դիմել:
Եղիշե Խաչատրյանին ծեծելով սպանելու գործով 4-րդ անձն է կալանավորվել: Հատուկ քննչական ծառայությունն առայժմ հրապարակում է միայն կալանավորվածի անունը՝ ոմն Յուրի: Հիշեցնենք, որ 58-ամյա տղամարդուն ծեծելով սպանել են մոր աչքի առջեւ: Նախաքննությունը շարունակվում է:
Ազգային անվտանգության ծառայությունը բողոք չունի ակտիվիստ Արտակ Գեւորգյանից, որը ստվարաթղթե տանկով հարվածել էր ԱԱԾ շենքին, ինչի պատճառով հայտնվել էր դատարանում: ԱԱԾ-ն գրություն է ուղարկել դատարան՝ տեղեկացնելով, որ միջադեպը իրենց կառույցի աշխատանքը չի խաթարել, աշխատակիցներին լուրջ անհանգստություն չի պատճառել: Ենթադրվում է, որ այս գրությունը կազդի Արտակ Գեւորգյանի դատավճռի վրա, որը կարող է հրապարակվել արդեն մի քանի օրից:Արտակ Գեւորգյանի դեմ ներկայացված մեղադրանքի անհեթեթությունն ընդգծելու համար ակտիվիստ Միքայել Նազարյանը այսօր դատարան է գնացել իր պատրաստած ռուսական ՌՊԳ-5 տեսակի ստվարաթղթե զենքը ձեռքին, դրանով շրջել Երեւանի փողոցներում, ապա այն դրել զենքը հանդիսավոր կերպով դրվեց Կառավարության շենքի մոտ։
Քառօրյա պատերազմում ծանր վիրավորված Արման Լազգիյանն արդեն տասն օր է՝ դադարեցրել է բուժումը Գերմանիայում, քանի որ ընտանիքը չի կարողանում վճարել վերականգնողական հետագա բուժման համար անհրաժեշտ 160 հազար եվրո գումարը: Լրագրողների հետ զրույցում Արմանի հայրն ասել է, որ իր հույսը անհատ բարեգործներն են, իսկ կառավարությունը չի օգնում: Ավելին՝ Միքայել Լազգիյանի մոտ տպավորություն է, որ իրենց խոչընդոտում են, օրինակ, առեւտրի կենտրոններում թույլ չեն տալիս դրամահավաք անցկացնել:
Կարելիայի Սյամօզերո լճում երկու օր առաջ տեղի ունեցած ողբերգության հետեւանքով վերջին տվյալով 13 երեխա է զոհվել, 33 երեխա էլ տարբեր վնասվածքներով հոսպիտալացվել: Եվս մեկ երեխայի մարմինն էլ դեռ չեն գտել: Մանկական վրանային ճամբարում հանգստացող 47 երեխաներ 4 հրահանգիչների ուղեկցությամբ երկու նավակներով ջրային արշավի էին ուղեւորվել, երբ ուժեղ փոթորիկ է սկսվել: Նավակները կողաշրջվել են, երեխաները փորձել են լողալով փրկվել, բայց ջուրը սառն է եղել, ոչ բոլորին է հաջողվել ափ հասնել: Զոհված երեխաները հիմնականում Մոսկվայից էին, 12- 13 տարեկան: Հարուցված քրեական գործով արդեն հինգ ձերբակալված կա՝ չորս ինստրուկտորները եւ Առողջարանային ճամբարի տնօրենը:Նրանց մեղադրում են անվտանգության կանոնները խախտելու եւ հանցավոր անգործության մեջ:
2016 թվականի ամառը ամենաշոգը կլինի մարդկության պատմության մեջ՝ կանխատեսել են ամերիկացի գիտնականները: Որպես ջերմաստիճանի բարձրացման գլխավոր պատճառ նրանք նշում են մարդու տեխնածին գործունեության հետեւանքով առաջացած ջերմոցային էֆեկտը:
Դոլարը մի փոքր արժեզրկվել է , իսկ ռուբլին, եվրոն ու ֆունտը՝ արժևորվել: Եվ այսպես՝ դոլարի փոխարժեքը կազմել է 476, ռուբլունը՝ 7.44, եվրոյինը՝ 540, ֆունտինը՝ 698 դրամ:
Հունիսի 21-ին օդի ջերմաստիճանը գրեթե նույնը կլինի, ինչ այսօր: Առաջիկա գիշերը Երևանում սպասվում է 15-17, իսկ վաղը ցերեկը՝ 28-30 աստիճան տաքություն: Հնարավոր է կարճատև անձրև:
