«Երեւան Ջուր» ընկերության աշխատակից Արթուր Թադեւոսյանը, որի ինքնազգացողությունը վատացել էր նախորդ օրը երեկոյան դիտահորում աշխատանքներ կատարելու ժամանակ, հիվանդանոցում ստուգվել է ու պարզվել է, որ շմոլ գազից չի թունավորվել: Այս մասին NEWS.am-ին հայտնեցին նրա հարազատները:
«Ինքնազգացողությունն է վատացել, երբ փորձել է ընկերոջը օգնել: Անալիզներով հաստատվել է, որ գազից չի թունավորվել»,- ասաց հարազատներից մեկը՝ նշելով, թե իրենք տեղյակ չեն դեպքի մանրամասներից:
Հարազատների խոսքով՝ Արթուր Թադեւոսյանը սրտի խնդիր է ունեցել, հավանաբար, հենց այդ պատճառով էլ վատացել է նրա ինքնազգացողությունը:
Հիշեցնենք, որ հունիսի 20-ին՝ ժամը 21.06-ին, ԱԻՆ-ը ահազանգ էր ստացել, որ Երեւանի Դավիթաշեն վարչական շրջանի Ձոր-1 թաղամասի դիտահորերից մեկում աշխատանքներ իրականացնելիս քաղաքացու ինքնազգացողությունը վատացել է, չի կարողանում ինքնուրույն դուրս գալ. անհրաժեշտ է փրկարարների օգնությունը: Պարզվել էր, որ դիտահորում վատ ինքնազգացողությամբ երկու քաղաքացի կա: Փրկարարները դուրս էին բերել 1964 թ. ծնված Արթուր Թադեւսյանին, որը տեղափոխվել էր «Արմենիա» հանրապետական բժշկական կենտրոն, բուժօգնություն ստացել ու դւոս գրվել: Մյուս քաղաքացին մահացել էր:
Մահացածն ու տուժածը «Երեւան Ջուր» ընկերության աշխատակիցներ են: Ընկերությունը հայտարարել է, որ պատասխանատվություն չի կրում պատահածի համար, քանի որ տղամարդիկ աշխատանքային ժամից դուրս, մասնավոր աշխատանք են կատարելիս եղել, երբ դեպքը պատահել է: