Անհատ տաքսու վարորդները դժգոհ են հայաստանյան շուկա «Yandex Taxi» օնլայն ծառայության մուտքից: «Ավտովարորդների պաշտպանության լիգայի» նախագահ Տիգան Հովհաննիսյանն այսօր՝ հունիսի 21-ին, լրագրողների հետ զրույցում ասել է, որ իրենք համարում են, որ դաշտում անհավասար պայմաններ են ստեղծվում, իրենք թույլ չեն տալու այդ տաքսի ծառայության մուտքը:
«Ինչո՞ւ են մեզնից լիցենզիա պահանջում, իսկ այդ տաքսիներից՝ ոչ: Եթե լիցենզավորվում են, թող լիցենզավորվեն բոլորը: Հակառակ դեպքում մենք պատրաստվում ենք մեր լիցենզիաները հետ հանձնել»,- ասել է Տիգրան Հովհաննիսյանը:
Տիգրան Հովհաննիսյանը նշել է, որ իրենք կարծում են՝ այսպիսով դաշտը մոնոպոլիզացվելու է:
Նշենք, որ «Yandex Taxi» օնլայն ծառայությունը հուլիսի 1-ից կգործի Հայաստանում: «Yandex Taxi» օնլայն ծառայությունն աշխատելու է տաքսի ծառայությունների հետ, ոչ թե անհատ վարորդների՝ 10 տոկոս կոմիսիայով: Նրա խոսքով, կգործի նաեւ օնլայն վճարման հնարավորություն, սակայն դա կլինի սեպտեմբերից: Yandex Taxi-ն շուկայում կառանձնանա նրանով, որ կառաջարկի 100 դրամ մինիմալ վճար՝ առաջին 2 կիլոմետրի համար: