Հայաստան այցի երկրորդ օրը՝ հունիսի 25-ին, Հռոմի Ֆրանցիսկոս պապը կայցելի Ծիծեռնակաբերդի հուշահամալիր, որը կառուցվել է 1967 թվականին: Նույնանուն բլրի վրա տեղակայված համալիրը նվիրված է 1915 թվականին Օսմանյան կայսրությունում թուրքական իշխանությունների կողմից կազմակերպված ցեղասպանության 1.5 մլն զոհերի հիշատակին: 

2015 թվականին՝ Հայոց ցեղասպանության 100-րդ տարելիցին, Հռոմի պապը Վատիկանի Սուրբ Պետրոսի տաճարում պատարագի ժամանակ հիշատակեց զոհերին եւ մարդկությանն ուղղված իր ուղերձում նշեց, որ Հայոց ցեղասպանությունը 20-րդ դարի առաջին ցեղասպանությունն է, որն իրագործվել է ազգային պատկանելության պատճառով:

Հայոց ցեղասպանության թանգարան-ինստիտուտի ղեկավարությունը Ֆրանցիսկոս պապի համար խորհրդանշական նվեր է պատրաստել:Տնօրեն Հայկ Դեմոյանի խոսքով, Պապին հուշահամալիրի պատկերով ոսկե մեդալ եւ քրիստոնեական մոտիվներով փորագրանկար են նվիրելու: 
Թանգարանում հույս ունեն, որ Ֆրանցիսկոս պապն իր տպավորությունները կկիսի պատվավոր հյուրերի հուշամատյանում:

Ցեղասպանության թանգարան-ինստիտուտը բացվել է 1995 թվականին: Այն գրեթե ամբողջությամբ գետնի տակ է գտնվում եւ կազմված է երկու հարկից: Թանգարանում ներկայացված են լուսանկարներ եւ հրապարակումներ, որոնք վկայում են մեկ դար առաջ հայ ժողովրդի դեմ իրագործված վայրագությունների մասին: 
2014 թվականի մայիսին Forbes ամսագիրը Հայոց ցեղասպանության թանգարան-ինստիտուտը ներառել է աշխարհի 9 թանգարանների շարքում, ուր յուրաքանչյուր մարդ պետք է այցելի:

Թանգարանից ոչ հեռու գտնվող պուրակում օտարերկրյա պետական գործիչները ծառ են տնկում՝ ի հիշատակ 1915-ի ողբերգական իրադարձությունների զոհերի: 
2001 թվականին Հռոմի Հովհաննես Պողոս 2-րդ պապը՝ Հայաստան ժամանած առաջին կաթոլիկ հովվապետը, նույնպես եղեւնի է տնկել: Շուտով պուրակում նաեւ Ֆրանցիսկոս պապի տնկած եղեւնին կլինի:

Բացի այդ, հուշահամալիրում նախատեսվում է Պապի հանդիպումը Ցեղասպանությանը վերապրածների եւ նրանց ժառանգների հետ:
«Դա շատ խորհրդանշական եւ կարեւոր է: Այդ մարդիկ սարսափելի արհավիրք են ապրել, փրկվել են նաեւ կաթոլիկ հոգեւորականների շնորհիվ, եւ հիմա առիթ ունեն հանդիպել կաթոլիկ եկեղեցու առաջնորդի հետ»,- նշեց թանգարանի փոխտնօրեն Սուրեն Մանուկյանը: