Հայաստանում Հռոմի պապին կողջունեն նաեւ Սիրիայից փախստականները: Այս մասին գրում է լեհական Wiadomosci պարբերականը:
Հռոմի Ֆրանցիսկոս պապը Հայաստան կայցելի Հովհաննես Պողոս 2-րդ պապի այցից 15 տարի անց, որը Երեւան էր ժամանել քրիստոնեության ընդունման 1700-ամյակի առիթով:
Հարկավոր է ուշադրություն դարձնել խաղաղության ուղերձին, որով Պապը Կովկաս է մեկնում: Այդ ուղերձն առանձնահատուկ նշանակություն ունի չլուծված ղարաբաղյան հակամարտության համար: Ենթադրվում է, որ Պապը խաղաղության կոչ կանի: Շատ կարեւոր, ցավոտ եւ բարդ հարց է Օսմանյան կայսրությունում 1915-17 թվականներին ավելի քան մեկ միլիոն հայերի կոտորածը, ինչպես նաեւ վեճերն այն մասին, արդյո՞ք դա պետք է Ցեղասպանություն կոչել: Անցյալ տարի Ֆրանցիսկոս պապը Վատիկանում պատարագի ժամանակ օգտագործեց այդ բառը՝ վկայակոչելով Հովհաննես Պողոս 2-րդին:
Սպասվում է, որ Կաթոլիկ Հովվապետի այցի ընթացքում ուշադրության կենտրոնում կլինեն Հայաստանի քրիստոնեական արմատները: Այն քրիստոնեությունը որպես պետական կրոն ընդունած առաջին երկիրն է:
Հիշատակի արարողությանը ներկա կլինեն նաեւ այն 400 հայերի ժառանգները, որոնց 1919 թվականին ապաստան են տվել Հռոմի պապի Կաստել Գանդոլֆո նստավայրում, նախ՝ Բենեդիկտոս 15-րդի, այնուհետեւ՝ Պիոս 11-րդի ժամանակ:
Պապը կլինի նաեւ Գյումրիում: Այստեղ քաղաքային հրապարակում նա պատարագ կմատուցի, որին կմասնակցեն նաեւ Ռուսաստանի տարբեր քաղաքների հայ համայնքի ներկայացուցիչներ: Ֆրանցիսկոս պապը կայցելի նաեւ որբանոց, Սուրբ Աստվածածին (Յոթ վերք) եկեղեցի, այնուհետեւ հայ կաթողիկե Սրբոց Նահատակաց եկեղեցի, որտեղ նրան կողջունեն նաեւ Սիրիայից փախստականներ:
Այցի ավարտին Ֆրանցիսկոս պապը կլինի Թուրքիայի հետ սահմանին գտնվող Խոր Վիրապի վանքում՝ Արարատից ոչ հեռու: Սա Հայաստանի ամենահայտնի ուխտավայրերից է: Այնտեղ Հռոմի պապն ու Ամենայն Հայոց կաթողիկոսը ճերմակ աղավնիներ բաց կթողնեն: