ՀՀ նախագահի նստավայրի «Ոսկեզօծ սրահում» ընթանում է Հռոմի Պապի եւ Սերժ Սարգսյանի դեմ առ դեմ ձեւաչափով հանդիպումը։
Ողջունելով Հռոմի Պապին՝ Սերժ Սարգսյանն ասաց. «Մենք շատ շնորհակալ ենք մեր հինավուրց հողին եւ բազմաչարչար ժողովրդին ջերմություն բերելու համար: Բարով եք եկել Հայաստան:
Մենք շատ ուրախ ենք, որ հաջորդ տարի նշելու ենք ՀՀ-Վատիկան դիվանագիտական հարաբերությունների 25-ամյակը եւ շատ ուրախ ենք, այս տարիներին շատ նշանակալի իրադարձություններ են եղել:
Նկատի ունեմ հովհաննես Պողոս Պապի այցելությունը, Գրիգոր Լուսավորչի արձանի տեղադրումը Սուրբ Պետրոս տաճարի որմնախորշում: Նկատի ունեմ Հայոց ցեղասպանության 100-րդ տարելիցին նվիրված պատարագը: Մեզ համար չափազանց մեծ նշանակություն ունի Գրիգոր Նարեկացուն տիեզերական վարդապետի կոչում շնորհելը»։
Նշենք, որ Հռոմի Ֆրանցիսկոս Պապը ՀՀ նախագահի նստավայր ժամանեց «Ռենո Լոգան» մակնիշի ավտոմեքենայով: Սերժ Սարգսյանը ՀՀ նախագահի նստավայրի դիմաց դիմավորել է Սրբազան քահանայապետին եւ ուղեկցել ներս:
Նախագահի հետ հանդիպմանը կհաջորդի Հռոմի Պապ Ֆրանցիսկոսի զրույցը Հայաստանի իշխանությունների ներկայացուցիչների, հասարակության, երկրում հավատարմագրված դեսպանների հետ։ Նախքան այդ կայացել էր երկու երկրների պատվիրակությունների փոխադարձ ներկայացման արարողությունը։