Երեւանի Հանրապետության հրապարակում այսօր` հունիսի 24-ին, տեղի ունեցավ վաղը կայանալիք էկումենիկ աղոթքի գլխավոր փորձը:
NEWS.am-ի նկարահանող խումբը հետեւել է գլխավոր փորձին, որին մասնակցել են Հովհաննես Չեքիջյանի երգչախումբն ու Հայաստանի ազգային ֆիլհարմոնիկ նվագախումբը: Աղոթքի ընթացքում կհնչի դասական երաժշտություն:
«Առաջին հատվածը հայկական դասական երաժշտություն է, իսկ երկրորդ հատվածում կսկսենք եվրոպականից, կավարտենք հայ կոմպոզիտորներով` Կոմիտաս եւ Արամ Խաչատրյան: Կհնչեն տարբեր կատարումներ»,- ասաց Մշակույթի նախարար Հասմիկ Պողոսյանը, որը նույնպես հետեւում էր գլխավոր փորձին:
Վաղն առաջին անգամ Ֆիլհարմոնիկ նվագախմբի հետ հանդես են գալու գերմանահայ երգչուհի Բասենցն ու ՀՀ նախագահի երիտասարդական մրցանակի դափնեկիր Տիգրան Օհանյանը: Հռոմի պապին անակնկալներ են սպասվում, որոնց մասին կազմակերպիչները դեռ լռում են:
Այսօրվա փորձին հետեւում էին մեծ թվով քաղաքացիներ:
Նշենք, որ էկումենիկ աղոթքը կմեկնարկի հունիսի 25-ին ժամը 19:00-ին: