Հռոմի Պապը գրառում է արել Հայոց ցեղասպանության թանգարան-ինստիտուտի պատվո այցելուների գրքում: (ֆոտոռեպորտաժ)
Ֆրանցիսկոս Պապը, մասնավորապես, գրել է. «Այստեղ աղոթում եմ՝ ցավը սրտիս մեջ, որպեսզի այլեւս երբեք նման ողբերգություններ, ինչպիսին սա է, չկրկնվեն, որպեսզի մարդկությունը չմոռանա եւ իմանա չարությանը բարությամբ հաղթել: Թող Աստված պարգեւի սիրեցյալ հայ ժողովրդին եւ ամբողջ աշխարհին խաղաղություն եւ մխիթարություն: Աստված պահպանի հայ ժողովրդի հիշողությունը: Հիշողությունը չի կարելի ոչ պղտորել, ոչ մոռանալ: Հիշողությունը խաղաղության եւ ապագայի աղբյուրն է»:
Նշենք, որ նա հայտնի է Հայոց ցեղասպանության հարցում իր դիրքորոշմամբ եւ բազմաթիվ անգամ 1915 թվականի դեպքերն անվանել է 20-րդ դարի առաջին ցեղասպանություն:
Ավելի վաղ նշվել էր, որ այսօր՝ հունիսի 25-ի առավոտյան այցելել է Հայոց ցեղասպանության զոհերի հիշատակի Ծիծեռնակաբերդի հուշահամալիր՝ ՀՀ նախագահ Սերժ Սարգսյանի եւ Ամենայն հայոց կաթողիկոս Գարեգին Բ-ի ուղեկցությամբ:
Ցեղասպանության թանգարան-ինստիտուտի պատվո այցելուների գրքում գրառում անելուց հետո թանգարան-ինստիտուտի տնօրեն Հայկ Դեմոյանը մոտեցել ու հուշանվեր է հանձնել Հռոմի Պապին:
Այնուհետեւ Հռոմի Պապին են մոտեցել Հայոց ցեղասպանությունը վերապրածների մի խումբ ժառանգներ՝ զավակներ և թոռներ, որոնց թվում էր հայտնի ցեղասպանագետ Վերժինե Սվազլյանը: Նրանց նախնիները, Մեծ Եղեռնի որբեր լինելով, Պիուս Տասնմեկերորդ Պապի որոշմամբ օթևան էին գտել պապական Կաստել Գանդոլֆո դղյակ-ամառանոցում:
Հավատացյալները Հռոմի Պապին ճանապարհել են «Viva Papa» վանկարկումներով:
Ծիծեռնակաբերդից Ֆրանցիսկոս Պապը եւ Գարեգին Երկրորդ Ամենայն Հայոց Կաթողիկոսը կուղեւորվեն Գյումրի, որտեղ պատարագ կանցկացնեն Վարդանանց հրապարակում՝ լատինական ծեսով: Դրանից հետո Հռոմի Պապը կուղեւորվի Հայ կաթողիկե «Տիրամայր Հայաստան» եկեղեցու Պողոսյան կրթական կենտրոն: Այստեղ Հռոմի Պապը կճաշի, կհանգստանա հատուկ իր համար պատրաստված սենյակում: Կրթական կենտրոնի աշխատակիցները նվեր են պատրաստել Հռոմի Պապի համար՝ երկու անտուն որբերի բրոնզե արձանիկ:
Երեկոյան Հռոմի Պապը Երեւանում էկումենիկ արարողություն կանցկացնի եւ աղոթք կբարձրացնի հանուն խաղաղության:
