Եվրոպայի 2016 թվականի առաջնությանն այնպես ստացվեց, որ ամենավստահ խաղը ցուցադրող երկու թիմերը՝ Իտալիան ու Գերմանիան, քառորդ եզրափակիչում հանդիպեցին: Այլ կերպ ասած՝ աշխարհի քառակի չեմպիոն իտալացիները խաղալու էին աշխարհի քառակի չեմպիոն գերմանացիների հետ:
Ֆրանսիացիները շատ գեղեցիկ առաջնություն են կազմակերպել, բայց խոստովանում են, որ իրենց երկրում ֆուտբոլն այնքան ժողովրդականություն չի վայելում, որքան Անգլիայում ու Գերմանիայում, որտեղ ֆուտբոլով պարզապես ապրում են:
1/8 եզրափակիչում Իտալիան պայքարից դուրս էր թողել Իսպանիային, իսկ Գերմանիան՝ ջախջախել Սլովակիային: Անտոնիո Կոնտեի թիմն այս մրցաշարում համարվում էր սիրվածներից մեկը: Չունենալով ուժեղ կազմ՝ նրանք, ամեն դեպքում, ուժեղ, գրագետ ֆուտբոլ էին խաղում: Իսկ այն մասին, թե ինչպես էին մեկ մարդու պես երգում պետական օրհներգը, կարելի է անվերջ խոսել:
Ծովից ծով ինտերնետ ռոմինգում Ucom-ի հետ Մինչև սեպտեմբերի 15-ն օգտվեք շարժական ինտերնետից 39 դրամ/ՄԲ և մուտքային զանգերից 150 դրամ/րոպե սակագներով նշված ծովափնյա երկրներում: Ամբողջական ցանկը` այստեղ |
Խաղը տեղի էր ունենում Բարդոյում, եւ քանի որ ես նախընտրել էի Ֆրանսիա-Իսլանդիա խաղը Սեն Դենիում, որոշոցի այս խաղն էլ դիտել Փարիզի ֆան-գոտում՝ Մարսյան այգիներում: Ինչպես միշտ՝ մինչ ֆան-գոտի հասնելը երեք անգամ զննեցին պայուսակս: Այս անգամ արդեն ինձ հետ ոչինչ չէի վերցրել:
Երեկ ֆան-գոտում այդքան էլ ուրախ չէր, որքան անգլիացիների խաղի ժամանակ: Բոլորը կլանված ֆուտբոլ էին դիտում: Խաղը, իրոք, բավական բարդ ու դրամատիկ ստացվեց: Կողքից զվարճանում էին միայն հարբած իռլանդացիները եւ ուրախ ուելսցիները: Ի դեպ, հետաքրքիր է այն, որ Իռլանդիան վաղուց արդեն տանն է, բայց իռլանդացիները դեռ շարունակում են սպառել Փարիզի գերաջուրը:
Ինձ համար ամենահետաքրքիր պահը խաղի երկրորդ կեսին էր: Ֆան-գոտում ավելի քան 10 հազար մարդ էր հավաքված, եւ հանկարծ առաջին շարքերը, ուժեղ բղավելով, սկսեցին հետ վազել, նրանց հետեւեցին նաեւ մյուսները: Կա՛մ պետք է վազողների ոտքերի տակ հայտնվեի, կա՛մ բոլորի հետ վազեի: Առաջին միտքն էր՝ մի տեղ ռումբ են տեսել:
Շուրջ 50 մետր վազեցինք, հետո կանգ առանք: Իսկ հետո մի կես ժամ միմյանց հարցնում էինք, թե ինչ էր պատահել ու ինչու էինք բոլորս վազում: Բոլորի պատասխանը նույնն էր. դե՝ բոլորը վազում էին, ես էլ վազեցի: Հետո ամբոխը հագստացավ ու շարունակեց դիտել ֆուտբոլը:
Մոտենում էին 11 մետրանոցները: Գերմանիան 1976 թվականից ի վեր չէր պարտվել 11 մետրանոցից, իսկ Իտալիան վերջին տարիներին Գերմանիայի սարսափն է: Ինչպես տեսաք՝ դա ամենազավեշտալի 11 մետրանոցների շարքն էր:
Երեք անգամ վրիպեցին գերմանացիները, չորս անգամ՝ իտալացիները: Արդյունքում ֆան-գոտում, որտեղ ավելի շատ Գերմանիայի համակիրներն էին, տոն էր: Խաղից հետո Էյֆելյան աշտարակն Իտալիայի դրոշի գույներով լուսավորվեց: Քանի որ խաղը շատ ուշ ավարտվեց, դեռ պետք էր մետրոյի կայարան հասնել: Ի պատիվ կազմակերպիչների նշեմ, որ մետրոն երկրպագուների համար անվճար էր, եւ ես 1.8 եվրո տնտեսեցի: Ճանապարհին լսում էի միայն՝ Դոյչլանդ, Դոյչլանդ...
Իսկ այսօր կխաղան տանտերերն ու այս առաջնության հեքիաթ Իսլանդիան:
Նշենք, որ Եվրո 2016-ի լուսաբանման գլխավոր հովանավորն է UCOM ընկերությունը:
Վերա Մարտիրոսյան՝ Փարիզից