Հայաստանի ԱԻՆ-ում, այսօր՝ հուլիսի 6-ին, ժամը 13.10-ին ահազանգ է ստացվել, որ Արագածոտնի մարզի Ապարան քաղաքի Բաղրամյան-Խաչատրյան-Շահումյան փողոցներում գտնվող տները հորդառատ անձրեւների հետեւանքով ջրալցվում են:

Դեպքի վայր են մեկնել մեկ մարտական հաշվարկ եւ հրշեջ-փրկարարական ջոկատի օպերատիվ խումբը:

Պարզվել է, որ Շահումյան փողոցի թիվ 26 տան 1-ին հարկը ջրալցվել է, 3 երեխաները 2-րդ հարկում են եւ չեն կարողանում դուրս գալ տանից. դուրս բերելու համար անհրաժեշտ է փրկարարների օգնությունը:

Մինչ հրշեջ-փրկարարների կանչի վայր հասնելը երեխաները տանից դուրս են բերվել տեղի ուժերով:

Ըստ տեղեկության՝ անձրեւաջրերը լցվում են Մաշտոցի փողոցի թիվ 36 (սեփականատեր Մ. Խ.), Բաղրամյան փողոցի թիվ 48 (սեփականատեր Ա. Ա.), Շահումյան փողոցի թիվ 26 (սեփականատեր Ա. Գ.), Ա.Խաչատրյան փողոցի թիվ 1 (սեփականատեր Ն. Հ.) տները, Գ.Նժդեհի փողոցի թիվ 3 շենքի մուտքը եւ Գ.Նժդեհի անվան թիվ 2 միջնակարգ դպրոցը:

Հրշեջ-փրկարարները քաղաքապետարանի աշխատակիցների հետ համատեղ Բաղրամյան, Խաչատրյան, Գ.Նժդեհի, Մաշտոցի և Շահումյան փողոցներում իրականացրել են ջրի հոսքի փոփոխման աշխատանքներ և բացել նշված փողոցներում գտնվող դիտահորերի կափարիչները, իսկ Գ.Նժդեհի փողոցի թիվ 3 շենքից մեկ երեխա դուրս են բերել շենքից:

Հրշեջ-փրկարարները քաղաքապետարանի աշխատակիցների հետ համատեղ Բաղրամյան, Խաչատրյան, Գ.Նժդեհի, Մաշտոցի եւ Շահումյան փողոցներում իրականացրել են ջրի հոսքի փոփոխման աշխատանքներ: