Ռուս-վրացական սահմանի «Վերին Լարս» անցակետի փակման վտանգը պետք է միշտ հաշվի առնել: Այս մասին, այսօր՝ հուլիսի 7-ին, կառավարության նիստում հայտարարել է Տրանսպորտի եւ կապի նախարար Գագիկ Բեգլարյանը:
Նրա խոսքով, այսօրվանից ցերեկային ժամերին ճանապարհը բաց կլինի, իսկ առավելագույնը 4-5 օրից ճանապարհը կբացվի շուրջօրյա ռեժիմով: Այդուհանդերձ, Վրաստանի կառավարությունը նախազգուշացնում է, որ մայրուղու մոտ լեռներում մոտ 5 մլն տոննա հոսող հող կա եւ առկա է սողանքի վտանգ:
«Մեր գործընկերները մտածում են առաջիկայում վերգետնյա թունել կառուցելու մասին, բայց դա մեծ ծախսերի հետ է կապված: Իսկ առայժմ պետք է հիշել, որ ճանապարհի փակման ռիսկն առկա ամեն մի հորդառատ անձրեւից հետո: Հետեւաբար, կոչ եմ անում բեռ տեղափոխող գործարարներին հաշվի առնել բոլոր հնարավոր վտանգները»,-ընդգծել է նախարարը:
Հիշեցնենք, որ հունիսի 23-ին Ռազմավիրական ճանապարհի Դեւդորակի կիրճում սողանք էր տեղի ունեցել, որի հետեւանքով փակվել է Վերին Լարսի ճանապարհը: Թերեք գետը ափերից դուրս է եկել եւ ոչնչացրել է Մցխեթա-Ստեփանծմինդա-Լարսի ճանապարհի 800 մետրանոց հատվածը (134-135 կմ):
Մասնագետներին գործնականում շուրջօրյա աշխատանքի վեց օր է անհրաժեշտ եղել Թերեք գետը նախկին հուն վերադարձնելու համար:
Հայ բեռնափոխադրողները իրենց բեռներն այս ընթացքում տեղափոխում են լաստանավով:
Հունիսի 30-ին եւ հուլիսի 1-ին ռուսական օդանավը 6 չվերթ է իրականացրել Վերին Լարսում մնացած ՀՀ 289 քաղաքացիներին հասցնելով Երեւան: Նրանց թվում են 73 կին եւ 31 երեխա: