Հայաստանում բավականին հաճախակի են հանգստյան տներին վերաբերող պետպատվերների հարցերով կեղծիքները: Այս մասին լրագրողներին հուլիսի 7-ին Կառավարության նիստից հետո հայտնել է Քաղաքացիական ծառայության խորհրդի ղեկավար Մանվել Բադալյանը:
Նա հիշեցրել է, որ այն միջոցներով, որոնք պետությունը հատկացրել է պետական ծառայողների սոցիալական աջակցության փաթեթին, նրանք կարող են հանգստանալու մեկնել Հայաստանի կամ Ղարաբաղի տարածքում (Կառավարության կողմից հաստատված հյուրանոցների կամ հանգստյան տների ցանկով): Բայց ամենայն հավանականությամբ պետծառայողների մի մասը պայմանավորվել է հանգստյան տների հետ՝ կեղծ պայմանագրերի մասին: Մարդիկ փոխանցել են գումարներ, իսկ հետո դրանք հետ են ստացել: Սրանք ոչ թե մասնավոր դեպքեր են, այլ բավականին լայն տարածում ունեն: «Ամեն դեպքում հարցը պետք է լուծվի շատ օպերատիվ ու բարեխիղճ ծառայողները չպետք է տուժեն»,- միաժամանակ ասել է Բադալյանը: Այն հարցին, թե սոցփաթեթում ինչքան ժամանակով կարող է չեղարկվել հանգստի բաղադրիչը, Բադալյանը պատասխանել է «Հույս ունեմ, որ ողջամիտ ժամկետով ու նույնիսկ ավելի կարճ»:
Հիշեցնենք, որ սոցփաթեթը պետծառայողներին տրամադրվում է 2012-ից սկսած, տարեկան 132 հազար դրամի չափով ( մոտ 280 դոլար): Դրանից 52 հազարը պարտադիր կարգով տրամադրվում է բժշկական ապահովագրությանը ( ծառայողի ու նրա ընտանիքի համար՝ կնոջ/ամուսնու ու մինչեւ 27 տարեկան երեխաների), մնացածը կարելի է ըստ հայեցողության ծախսել հիպոտեքային վարկի, ուսման վարձի կամ հանգստի վրա ( պաշտոնյայի ու նրա ընտանիքի): 2015-ից սկսած պարտադիր բժշկական բաղադրիչին գումարվել է եւս 8 հազարդ դրամ ( ախտորոշման համար): Ազատ գումարը մնացել է 72 հազար դրամի չափով:
