Խոսքը պետծառայողների սոցփաթեթներից հանգստի բաղադրիչը հանելու մասին չէ, այլ կասեցնելու՝ 2017-2019 թվականների համար: Այս մասին այսօր՝ հուլիսի 7-ին, կառավարության նիստից հետո լրագրողների հետ զրույցում նշել է Աշխատանքի եւ սոցիալական հարցերի նախարար Արտեմ Ասատրյանը:
«Ինչպես վարչապետը նշեց, կասեցնելու մասին է խոսքը, 2017-19 թվականների միջնաժամկետ ծախսերի ծրագրի շրջանակներում: Ուսումնասիրությունները, որոնք իրականացվում են վարչապետի հանձնարարությամբ, առաջիկայում կավարտվի ու կարծում եմ, բյուջետային հայտի շրջանակներում կքննարկվի վերջնական որոշում ընդունելու հարցը»,-ասաց նա:
Հարցին, թե եթե իրավապահները չեն կարողանում պայքարել չարաշահումների դեմ, ինչո՞ւ պետք է բարեխղճորեն փաթեթներից օգտվողները զրկվեն հանգստի հնարավորությունից, նախարարն արձագանքեց. «Ես դեռեւս չէի շտապի ասել, որ կզրկվեն, վերջնական որոշում դեռ չկա, դեռ վաղ է վերջնական եզրակացություն անել, թե ինչպիսին կլինեն լուծումները: Այո կան պարտաճանաչ օգտվող պետծառայողներ եւ հատկացված միջոցները պետք է իրենց նպատակին ծառայեն:
Նրա խոսքով, պետական բյուջեից սոցփաթեթների համար տրամադրվում է մոտ 10 մլրդ դրամ, սոցփաթեթի ծառայություններից օգտվում են շուրջ 100 հազար քաղաքացի:
