Սյունիքի մարզի Գուդեմնիս գյուղում սողանքից ջրագծի վնասվելու հետեւանքով բնակիչները զրկվել են խմելու ջրից, իսկ մարզպետարանից գյուղապետին հորդորել են սպասել մինչեւ հանգստյան օրերի ավարտը:
Գյուղապետ Արտուշ Գրիգորյանը NEWS.am-ի հետ զրույցում ասաց, որ զանգահարել է մարզպետարանի քաղաքաշինության վարչության պետին, ով պատասխանել է, որ երկուշաբթի կտեղեկացնեն մարզպետին կամ մարզպետի տեղակալին ու նրանք կզբաղվեն այդ հարցով: Մինչ այդ գյուղացիները կմնան առանց խմելու ջրի:
«Սողանքային տարածք ա, միշտ լինում ա նման բան, բայց այս անգամ ավելի ուժգին եղավ, 100 մետր ջրագիծը կոտրվել է, պետք է փոխել, նորը դնել: Ոռոգման եւ խմելու ջուր չկա այս պահին, խմելու ջուրը դույլերով են կրում գյուղի աղբյուրից»,- ասաց գյուղապետը՝ նշելով, որ Արտակարգ իրավիճակների նախարարությունից եկել են, արձանագրել վթարն ու գնացել:
Նշենք, որ ջրագիծը վնասվել է հուլիսի 8-ին՝ ժամը 17.00-ի սահմանում, այսինքն գյուղացիները առանց ջրի պետք է մնան 3 օր, մինչեւ երկուշաբթի նոր այդ մասին տեղեկացնեն մարզպետ Սուրիկ Խաչատրյանին, որից հետո նոր պարզ կլինի, թե ինչպես են լուծելու խնդիրը:
Ավելի վաղ NEWS.am-ը հայտնել էր, որ ժամը 16.52-ին տեղեկություն է ստացվել, որ Սյունիքի մարզի Գուդեմնիս գյուղի վերջնամասում տեղի է ունեցել սողանք, ինչի հետեւանքով վնասվել է գյուղը սնուցող խմելու ջրի ջրագիծը: Պարզվել է, որ տեղի է ունեցել 40 մ երկարությամբ, 15 մ լայնությամբ եւ 15 մ խորությամբ սողանք, ինչի հետեւանքով վնասվել է գյուղը սնուցող խմելու ջրի խողովակը եւ ոռոգման ջրի առուն: Փրկարարները դադարեցրել են խմելու ջրագծի արտահոսքը: Դեպքի մասին տեղեկատվությունը փոխանցվել է ճգնաժամային կառավարման ազգային կենտրոնում բնապահպանության նախարարության ներկայացուցչին եւ մարզպետարանի քաղաքաշինության վարչության պետին: