Մոսկվայում խարդախության համար չորս տարվա ազատազրկման դատապարտված Լեւոն Հայրապետյանի համար Երեւանում ցույցեր եւ նստացույցներ են անցկացվելու: Այս մասին այսօր` հուլիսի 11-ին, լրագրողների հետ հանդիպմանն ասաց Հայրապետյանին սատարող խմբի անդամ, իրավապաշտպան Հայկազ Մակարյանը:
«Ցույցերը շարունակվելու են այնքան ժամանակ, մինչեւ որ «Զվարթնոց» օդանավակայանում բոլորս կդիմավորենք Լեւոն Հայրապետյանին: Ինքս էլ նստացույցեր եմ կազմակերպելու Հայաստանում Ռուսաստանի դեսպանատան դիմաց»,- ասաց Հայկազ Մակարյանը:
Ըստ իրավապաշտպանի` Հայաստանի իշխանությունները նույնպես պետք է համապատասխան քայլեր ձեռնարկեն. Ազգային ժողովում պետք է արտահերթ նիստ հրավիրվի, քննարկվի Հայրապետյանի խնդիրը եւ հայտարարությամբ դիմեն Ռուսաստանի իրենց գործընկերներին:
«Տեղեկություններ կան, որ սա պետական պատվեր է, Հայաստանի իշխանությունները պայմանավորվել են որոշ շահագրգիռ կողմերի հետ»,- նշեց Հայկազ Մակարյանը:
Հիշեցնենք, որ ապրիլի 14-ին Լեւոն Հայրապետյանը դատապարտվել է չորս տարվա ազատազրկման: Հայրապետյանն առողջական լուրջ խնդիրներ ունի եւ հարազատների պնդմամբ, բանտային պայմաններն իր համար չեն: