Արմավիրի մարզի Դողս գյուղում հուլիսի 10-ին տեղացած ուժեղ կարկուտն ամբողջությամբ փչացրել է գյուղացիների բերքը:
Այս գյուղում կարկուտը տեղացել է երկու անգամ. նախօրեին երեկոյան ժամը 21:00-ին կարկուտը փչացրել է բերքը, կոտրել պատուհանների ապակիները, վնասել ավտոմեքենաները, իսկ այսօր վաղ առավոտյան տեղացած կարկուտը կարծես վերջնական հարվածն է հասցրել:
«Երեխայիս պես խնամել եմ էս լոբին, պիտի հավաքեի արդեն, ծախեի, էն էլ ամբողջը փչացավ: Ոչ բադրիջան ա մնացել, ոչ պոմիդոր, ոչ կարտոֆիլ: Ամբողջը ավիրվել ա»,- ասում է տիկին Ռուզաննան, որի ընտանիքի միակ եկամուտը հողատնտեսությունն է:
Տիկին Ռուզաննայի ընտանիքը հույս ունի, որ պետությունը գոնե կսառեցնի իրենց վարկերը, ժամանակավոր կհանի հողի հարկը, ջրի վարձը:
«Վարկեր ունենք, պարտքեր, հիմա անելանելի վիճակում ենք»,- նշում է տիկին Ռուզաննայի ամուսինը` Համլետ Գրիգորյանը:
Սամվել Ստեփանյանի 7 հոգանոց ընտանիքի միակ հույսը նույնպես հողագործությունից ստացվող եկամուտն էր: Կարկուտը փչացրել է ոչ միայն բանջարեղենը, այլեւ սալորը, դեղձը, ծիրանը: Թե ինչ են անելու, իրենք էլ դեռ չգիտեն, հույս ունեն, որ գոնե Կառավարությունը փոխհատուցում կտա: Ամեն դեպքում դողսեցիներն այսօր առավոտից իրենց միջոցներով փոխում են կոտրված ապակիները` համոզված լինելով, որ այս մասով պետությունը ոչ մի փոխհատուցում էլ չի տալու:
Նշենք, որ Դողսում չկա մի ընտանիք, որի բերքն ամբողջությամբ փչացած չլինի: