Ապրիլյան քառօրյա պատերազմից հետո բանակում կատարված փոփոխությունները բավարար չեն ասելու համար, որ պատերազմից դասեր ենք քաղել: Այս մասին այսօր` հուլիսի 12-ին, լրագրողների հետ հանդիպմանն ասաց քաղաքագետ, «Մոդուս Վիվենդի» կազմակերպության ղեկավար Արա Պապյանը:
«Մի ձերբակալված գեներալ, մի երկու պաշտոնանկություն ու ոչ մի հետեւություն: Պատերամի հարյուր օրը լրացավ երեկ, հարյուր օրվա ընթացքում ներքաղաքական փոփոխություններ չեմ տեսնում: Որոշակի բարելավումներ կան սահմանի վրա` զինատեսակներ, նոր սարքեր, բայց էական առումով անորոշ է մնում ռուսական 200 միլիոն զենքի հարցը»,- ասաց Արա Պապյանը` նշելով, որ միաժամանակ Ռուսաստանն էլ հայտարարում է, որ շարունակելու է զենք վաճառել Ադրբեջանին:
Քաղաքագետը ապրիլյան քառօրյա պատերազմի եւ Լիբանանյան երկրորդ պատերազմի միջեւ համեմատություն անցկացրեց, երբ 34 օրվա ընթացքում Իսրայելը նույնքան զոհ ունեցավ, որքան մենք 4 օրվա ընթացքում: Նա հիշեցրեց, որ թեեւ Իսրայելը պարտվող կողմ չէր, սակայն պատերազմից հետո 50 հանձնաժողով ստեղծվեց, որոնք քննեցին, թե ինչու բացարձակ հաղթանակ չտարան ու այդքան զոհ ունեցան:
«Քննությունը հանգեցրեց նրան, որ պաշտպանության նախարարն ու շտաբի պետը պաշտոնանկ արվեցին, իրենք համարեցին, որ իրենց 150 զոհը շատ է` լինելով հարձակվող կողմ: Իսկ մեր մոտ ո՞ր գեներալը կամավոր հրաժարական տվեց, ասաց` իմ խղճի վրա չի նստի, իմ համար անպատվաբեր է դա: Մեզ մոտ եղան միայն ամպագորգոռ հայտարարություններ, բայց արդյունք չեղավ»,- ասաց քաղաքագետը:
Պատերազմից հարյուր օր հետո, ըստ քաղաքագետ, արտաքին ճնշումն ավելանում է հայկական կողմի վրա եւ հարցի լուծումը դիտարկվում է հայկական կողմի միակողմանի զիջումների վրա:
«Փոխզիջում չի, քանի որ Ադրբեջանը ոչինչ չի զիջում: Խոստում է տալիս, որ ապագայում կարող է քննարկել ճանաչման հարցը: Բայց միաժամանակ Ադրբեջանի նախագահը հայտարարում է, որ բացառվում է Լեռնային Ղարաբաղի անկախությունը ճանաչեն: Ղարաբաղի նախիջեւացումն իրենք մեզ հրամցնում են որպես փոխզիջում»,- ասաց քաղաքագետը` կարծիք հայտնելով, որ եթե տարածքները հանձնվեն, միեւնույն է, Ադրբեջանը Արցախի Հանրապետությունը չի ճանաչի: