Գյումրիի գործող քաղաքապետ Սամվել Բալասանյանն ավելի հին է, քան «Բարգավաճ Հայաստան» կուսակցությունը: Այս մասին այսօր` հուլիսի 13-ին, լրագրողների հետ հանդիպմանն ասաց ՀՀԿ փոխնախագահ Արմեն Աշոտյանը` անդրադառնալով դիտարկմանը, թե իշխող կուսակցությունը կադր չուներ, որ Գյումրիում սատարում է նախկին ԲՀԿ-ականին:
Ըստ Արմեն Աշոտյանի` իրենք արդեն իսկ ապացուցել են, որ քաղաքական մենաշնորհի խնդիր չունեն. կան նույնիսկ նախարարներ, որոնք անկուսակցական են:
«Սա քաղաքական ընտրություն է, որտեղ պայքարելու ենք մեծագույնս ներկայացվելու համար: Այս ընտրություններն անձնավորված են, սակայն անձի համար չեն: Ակնհայտ է, որ սրանք քաղաքական ընտրություններ են: Սամվել Բալասանյանի դեպքում մեզ համար կարեւոր է, որ գյումրեցին բարձր է գնահատում Բալասանյանի կատարած աշխատանքը, նվիրվածությունը քաղաքին: Սա մեզ թույլ է տալիս` փաստելու, որ մեր թիմով կարող ենք հաջողության հասնել Գյումրիում: Ինչ վերաբերում է հարցին, թե ինչու անկուսակցական թեկնածու, նշեմ, որ մենք շարունակելու ենք ներգրավել մարդկանց, որոնք լավագույնս կաշխատեն տարբեր ոլորտներում: Մենք կոմունիստական կուսակցություն չենք եւ չենք լինելու»,- ասաց նա:
Կուսակցության փոխնախագահը նշեց, որ կարեւոր է, որ լինեն կուսակցական, սակայն դա պարտադիր պայման չէ:
Նշենք, որ Գյումրիում ՀՀԿ-ն ընտրություններին մասնակցելու է դաշինքով: Սա նույնպես պետք է դեռ հաստատվի ԳՄ նիստում:
«Չզարմանաք, որ մոտ ապագայում այլ դաշինքներ նույնպես մեզ միանան»,- հավելեց Աշոտյանը:
Հիշեցնենք, որ Գյումրիի ավագանու ընտրությունները նախատեսված են հոկտեմբերի սկզբին: