Քաղաքապետը, ոչ անտիկվարիատ է, ոչ Պիկասոյի կտավ, եւ ոչ էլ Ֆաբեռժեի ձու, որ որքան հին լինի ՝ այնքան արժեքավոր: Այս մասին հայտարարել է ԲՀԿ խոսնակ Վանիկ Էլիզբարյանը՝ անդրադառնալով ՀՀԿ փոխնախագահ Արմեն Աշոտյանի այն հայտարարությանը, թե Գյումրիի քաղաքապետ Սամվել Բալասանյանը ավելի հին է, քան ԲՀԿ-ն:
Ավելի վաղ NEWS.am-ը հայտնել էր, որ այսօր՝ հուլիսի 13-ին, լրագրողների հետ հանդիպմանն ասաց ՀՀԿ փոխնախագահ Արմեն Աշոտյանը անդրադառնալով դիտարկմանը, թե իշխող կուսակցությունը կադր չուներ, որ Գյումրիում սատարում է նախկին ԲՀԿ-ականին, ասել էր. « Սամվել Բալասանյանն ավելի հին է, քան «Բարգավաճ Հայաստան» կուսակցությունը»:
Ըստ Արմեն Աշոտյանի` իրենք արդեն իսկ ապացուցել են, որ քաղաքական մենաշնորհի խնդիր չունեն. կան նույնիսկ նախարարներ, որոնք անկուսակցական են. «Սամվել Բալասանյանի դեպքում մեզ համար կարեւոր է, որ գյումրեցին բարձր է գնահատում Բալասանյանի կատարած աշխատանքը, նվիրվածությունը քաղաքին: Սա մեզ թույլ է տալիս` փաստելու, որ մեր թիմով կարող ենք հաջողության հասնել Գյումրիում»:
Հիշեցնենք, որ Գյումրիի ավագանու ընտրությունները նախատեսված են հոկտեմբերի սկզբին:
