Պետծառայողների սոցփաթեթի հանգստի բաղադրիչում առկա չարաշահումները կազմել են 300 մլն դրամ: Այս մասին, այսօր՝ հուլիսի 14-ին, կառավարության նիստում նշել է Վերահսկիչ պալատի նախագահ Իշխան Զաքարյանը:
Նրա խոսքով, վարչապետի 2016-ի մարտի 24-ի հանձնարարությամբ, ՎՊ-ն ուսումնասիրություններ է կատարել սոցփաթեթի շահառուների հանգստի կազմակերպման ծախսերի մասով, մասնավորապես ուսումնասիրվել են Ծաղկաձորում, Դիլիջանում, Արզաքանց, Արզնի, Արտավան համայնքներում առկա հանգստյան տներն ու հյուրանոցները եւ հայտնաբերվել է մոտ 300 մլն դրամի տարբեր տիպի խախտում:
«Ծաղկաձորում 21 հանգստյան տներում եւ հյուրանոցներում հայտնաբերել ենք 128 մլն 681 հազար դրամի խախտում: Ջերմուկի 13 հանգստյան տներում հայտնաբերվել է 62 մլն 437 հազար դրամի խախտում: Դիլիջանի 7 հանգստյան տներում՝ 43 մլն 490 հազար դրամի խախտում»,-ասաց նա:
Իշխան Զաքարյանի խոսքով, ծախսերը կատարվում են զբոսաշրջային օպերատորների կողմից, որոնց լիցենզավորում է Էկոնոմիկայի նախարարությունը. խոսքը 69 զբոսաշրջային օպերատորների մասին է, որոնցից ՎՊ-ն ուսումնասիրություն է կատարել 7-ում:
Վերահսկիչ պալատը պարզել է, որ որոշ զբոսաշրջային ընկերություններ լիարժեք չեն կատարել հյուրանոցների հանդեպ ունեցած իրենց պարտավորությունները, բյուջեից ստացված գումարները ծախսել են այլ նպատակներով, ինչի պատճառով էլ գոյացել են այս պարտքերը:
Հավաստագրերը տրված են եղել սոցփաթեթի շահառուների անունով, սակայն հաճախ օգտվել են շահառու չհանդիսացող անձինք: Երրորդ խնդիրը սոցփաթեթի գումարի ապօրինի կանխիկացումն է: ՎՊ նախագահը ընդգծեց, որ մի քանի զբոսաշրջային ընկերություններ ծառայություններ են մատուցել առանց Էկոնոմիկայի նախարարությունում հաշվառված լինելու և ըստ այդմ, հաշվառումը կրել է ձևական բնույթ:
Խախտումներից մեկն էլ այն է, որ սոցփաթեթի գումարները պետբյուջեից փոխանցվել են բանկերում բացված հաշիվներին, սակայն մի շարք բանկերի կողմից զբոսաշրջային օպերատորներին փոխանցումներ չեն կատարվել:
«Ելնելով վերոգրյալից՝ Վերահսկիչ պալատն առաջարկում է ՀՀ կառավարությանը՝ ոլորտը կարգավորող իրավական ակտերի պահանջները շրջանցելու, ինչպես նաև սոցիալական փաթեթի գումարների անօրինական կանխիկացման դեպքերը բացառելու համար լրամշակել սոցփաթեթի հանգստի բաղադրիչին վերաբերվող դրույթները», -ասաց Իշխան Զաքարյանը:
Վարչապետ Հովիկ Աբրահամյանի հարցին, թե որոշե՞լ է Վերահսկիչ պալատի խորհուրդը, ինչ են անելու ուսումնասիություների արդյունքները, ՎՊ նախագահն ասաց, որ ուսումնասիրություների արդյունքները հասկանալու համար պետք է 100 տոկոսով լիցենզավորված կառուցներում ուսումնասիրություն կատարվի: Իշխան Զաքարյանը խնդրեց, որ վարչապետի վերահսկողական ծառայությունը ևս համագործակցի իրենց հետ: