2017 -ին ԵՄ-ն կսկսի իրականացնել Հայաստանի հետ վիզային ռեժիմի ազատականացման գործընթացը։ Այս մասին հուլիսի 15-ին՝ Երեւանում ԵՄ-Հայաստան հարաբերությունների հեռանկարների քննարկման ժամանակ, ասել է Հայաստանում Եվրոպական հանձնաժողովի պատվիրակության ղեկավար Պյոտր Սվիտալսկին:
Ի հաստատումն դրա՝ նա անդրադարձել է նոր փաստաթղթերի նախագծերին, որոնք կազմվել են Բրյուսելում: «Դրանք մեր առաջնահերթությունների մի մասն են 2017–ի համար», - հավելել է նա: Եվրոպացի պաշտոնյայի պնդմամբ՝ ԵՄ-ն Արեւելյան գործընկերության երկրներին միանման է վերաբերում՝ անկախ այն հանգամանքից, թե նրանք որոշել են համագործակցել Եվրամիության հետ, թե ոչ։
«Բրյուսելը խտրականություն չի դնում։ Իհարկե, Մոլդովայի, Վրաստանի եւ Ուկրաինայի հետ, որոնք ընտրել են եվրոպական ասոցիացիան, ԵՄ-ն ունի այլ օրակարգ, քան Հայաստանի, Ադրբեջանի եւ Բելառուսի հետ։ Այնուամենայնիվ, ԵՄ-ն կողմնակից է համագործակցությանը, այլ ոչ թե բաժանարար գծերի:
«Նոր պայմանագրով Հայաստան - ԵՄ բանակցությունները արդեն իսկ ընթանում են, եւ առաջընթացը նկատելի է: Մենք քննարկում ենք մեր աջակցության հետագա ուղղությունները», - ասել է Սվիտալսկին:
Հիշեցնենք, որ 2013-ից ԵՄ քաղաքացիները կարող են Հայաստան այցելել առանց վիզայի: Իսկ Հայաստան – ԵՄ վիզային ռեժիմի ազատականացման համաձայնագիրը, որն ուժի մեջ է մտել 2014 թվականի հունվարից, պարզեցրել է Հայաստանի քաղաքացիների համար կարճաժամկետ վիզաների ընթացակարգերը դիմումների գործընթացը։