Նիսում հուլիսի 14-ին տեղի ունեցած ահաբեկչության հետեւանքով վերջին տվյալներով վիրավորված հայեր չկան:
«Այս պահին չկա տեղեկատվություն, որ վիրավորվածներ կան»,- NEWS.am-ի թղթակցին ասաց ՀՀ ԱԳՆ մամուլի խոսնակ Տիգրան Բալայանը:
Նշենք, որ ահաբեկչության հետեւանքով ՀՀ քաղաքացի է զոհվել. երիտասարդը կինը Ֆրանսիա էր տեղափոխվել մի քանի տարի առաջ, մանկահասակ երեխա ուներ:
Հիշեցնենք, որ հուլիսի 14-ի երեկոյան բեռնատարի վարորդը մխրճվել էր մարդկանց բազմության մեջ, որոնք հավաքվել էին Նիսի Անգլիական ափին՝ Բաստիլի գրավման օրվան նվիրված հրավառությունը դիտելու։ Ականատեսների վկայությամբ՝ բեռնատարը, 2 կմ զիգզագաձեւ ընթացքով անցնելով, ճզմել է մարդկանց։ Վարորդը սպանվել էր ոստիկանական ուժերի կողմից։ Ֆրանսիայի նախագահ Ֆրանսուա Օլանդը հարձակումը ահաբեկչություն է որակել։
Պաշտոնական տեղեկություններով՝ հարձակման հետեւանքով 84 մարդ է զոհվել, այդ թվում՝ 10 երեխա: Ըստ Փարիզի դատախազության՝ ահաբեկչության հետեւանքով տուժել է 202 քաղաքացի: Նրանցից 52-ը ծայրահեղ ծանր վիճակում են, 25-ն էլ վերակենդանացման բաժանմունքում: